Dionis Tanasoglonun 100-cü yıldönümünä karşı Komratta regional bibliotekasında andılar onun katkısını gagauz halkına
Komratta dolay bibliotekasında tombarlak masa geçti anılmış şairın, yazıcının hem dramaturgun Dionis Tanasolonun 100 yıldönümünä adalı. O duudu orak ayın 7-dä Kiriet-Lunga küüyündä. Olayda bizim çekim grupamız da bulundu.
Şairin, yazıcının hem dramaturgun Dionis Tanasoglonun 100 yıldönümünnän baalı GHT kabletti kararı 2022 yılı Dionis tanasoglonun anmak yılı adlamaa. Regional bibliotekasında olay Dionis Tanasoglonun önemli erinä gagauz dilin hem literaturanın ilerlemesindä baalıydı, urguladı Gagauziyanın regional bibliotekasının genel uzmanı Evgeniya Lülenova.
«Dionis Tanasoglo zengin taraflı bir adamdı. O türlü sferalarda çalıştı – gagauz yazıcısıydı, şair, dramaturg, filologiya doktoru, SSR yazıcıların birliin temsilcisi, profesor, Gagauziyanın şannı yaşayanı, muzikacı, rejisör hem başka».
Komrat uşak muzika okulun eks-öndercisi İvan Lülenov sayȇr, ani Dionis Tanasoglo yaraşȇr anılmış rus kompozitorunnan Mihail Glinkaylan, angısı rus klasika muzikanın kurucuların birisiydi.
«Bän düşünerim, ani onun çoyu işleri gösterdilär, angı yoldan gagauz muzikacılar, kompozitorlar hem hepsi, kim baalı muzika kulturasınnan lääzım gitsinär».
Tombarlak masanın taa bir payalanı Beşalma küüyün istoriya-etnografiya muzeyin başı Lüdmila Marin nışannadı, nekadar önemli bu olaylar ki gagauz anılmış insannarını hem onnarın yaptıklarını aklında tutmaa. Bundan kaarä meraklı aklına getirmeklerinnän paylaştı o vakıtlar için, açan muzeydä yaradıcılık elitası türlü literatura avşamnarını geçirärdi.
«Onun taa sık yoktu serbest vakıdı, ama kimi sıra olabilärdi gelsin bu avşamnara. Bir yıl onnar küüyün Kultura evindä toplandıydılar. Sţenadan anılmış klasiklerin yaratmalarını, şiirlerini ya kendi şiirlerini okardılar. Tutȇrım aklımda nesoy susardı hepsi. Bu okumaklara gelärdi käär o insannar kim bunu sevärdi hem kimä meraklıydı».
Gagauziyan okullarında hem uşak başçalarında Dionis Tanasoglo aanmak olayları geçirildi.
Источник grt.md 07.07.2022