Dezgincä küüyündä açtılar gençlik merkezini
Dezgincä küüyundä gençlär için maasuz merkez açıldı. Onun yapılmasına erideki kuvetlär harcadılar 350 bin ley.
Gençlär için merkezin yapılması başlamıştı taa geçän yılın bitkisindän o erdä, neresini belli etti primariya. Düzmäk işlerini geçirildilär, neçinki yapının ne kapusu, ne dä pençeresi kaldı, şindi sä hepsi eniliklär zamandaş koşullara uyerlar, nışannadı Dezgincä küüyunün başı Vasiliy Kapsamun.
“Biz pek inanȇrız, ani bu merkez bizdä küüdä ii uurda çalışacek. Burayı katılacek gençlär 12 yaşından yükarı. Savaşacez, ani gençlär kabletsinnär ii fikirleri”, — söledi primar.
Küü sovetin başı Stepan Bankov urguladı, ani sovet azaların çoyu kayıl oldular küüdä bölä bir kurum olsun, da tutturdular onun yapılmasına para verilmesini.
“Sanȇrım, ani gençlär biraz şennendilär. Onnar için düşünerlär, hatır güderlär. Sanȇrız, ani ii illerlemäk olacek”, — söledi küü sovetin başı.
Merkezin baş neeti – yardım etmää gençlerä ilerlemää, eni bilgileri kabletmää, vermää kolaylık evlad boylara kendi incäzanaat becermeklerini peydalamaa, urguladı gençlik merkezin öndercisi Marina Uzun.
“İi bir merkez, neçinki var nicä ilerletsinnär kendi talantlarını. İsterim burayı gelsin insannar, angıları becererlär işlemää gençlärlän, versinnär onnara bişey eni, üüretsinnär”, — söledi merkezin başı.
Genç insan var çok, ama onnar yoktu nereyı toplansınnar. Şindi peydalandı kolaylık ii uurda kendi serbest vakıdını geçirmää, sölerlär gençlär.
“Gençlär var nicä meraklı geçirsinnär vakıdı, toplansınnar. Bu er bizä etişmäärdi, pek şenim, ani o açıldı”.
“ Bän sanȇrım, ani gençlär var nicä olacek kendi talantlarını da ilerletsinnär burada hem taa aktiv olsunnar”.
Gençlik merkezi — o er, neredä toplanaceklar gençlär, deyni konuşmaa hem dinnenmää, eni dostları bulmaa hem faydalı vakıdı geçirmää. Nicä nışannadı primar, erideki kuvetlerindä peydalandı kolaylık taa yakın olmaa küüyün genç yaşayannarına da birerdä onnarlan lafetmää gelecek için.
Источник grt.md
