Devlet uurunda tenderların giçirilmesi için kanon kabledildi
«Devlet uurunda tenderlerı giçirilmesi için Gagauziyada » Kanonu Gagauziya Halk topluşu deputatları kablettilär.Bu kanon 2022 yılda hederlez ayında sayıya koyuldu. Onun avtorları Aleksandr Tarnavskiy hem Mihail Jelezoglo. Kanona kendi kayıllıını Bakannık komiteti verdi.
«Devlet uurunda tenderlerı giçirilmesi için Gagauziyada » Kanonu yazıldı maasuz Bakannıık komitetinä hem Gagauziya Halk topluşuna.Nicä nışannadı viţe-spiker Aleksandr Tarnavskiy gagauz kanonu karşı gitmeer devlet kanonuna hem verer kolaylık para harcamak proţesini taa açık insannara deyni yapmaa .
ALEKSANDR TARNAVSKİY GHT viţe-spikerı : » Gagauziya Halk topluşu hem Bakannık komiteti lääzım olacȇklar kendi ofiţıal saytlarında erleştirsinnär hepsi annaşmakları. Maasuz onnarı,angıları 20 bindän zeedä kurȇrlar. Moldova Devletindä bu norma yok.Onnar saytlarına koymȇȇrlar annamaşları ,angıları 200 bin ley tutȇrlar hem sayılȇrlar nicä devlet bücet harcamakları».
Viţe- spiker Aleksandr Tarnavskiy annattı, nesoy eniliklär var gagauz kanonunda.Avtorlar teklif ettilär satın alan iş grupasına Gagauziya Halk topluşu infrastruktura ,transport,baalantılar hem düzmäk komisiyasının temsilcisi girsin hem onda olsun hak sesini vermää.
ALEKSANDR TARNAVSKİY GHT viţe-spikerı : » Satın alan organın ofiţıal sayfasında erleştirilecek diil sade annaşmalar,ama onnarın paasını da. Belli olacȇk nekadar harcadılar hem nereyi.Angı kontrakt ödenmiş,angısı diil.Biz dayma kavga ederiz neçin yok açıklık hem dooruluk devlet uurunda geçirilän satın almaklarında».
Devlet uurunda geçirlenän tenderlar Gagauziyanın bücetin harcamak bölümün en büük payı. Aleksandr Tarnavskiy sayȇr , ani gagauz kanonu verecek kolaylıı bu satın almakları taa faydalı hem açık geçirmää.
ALEKSANDR TARNAVSKİY GHT viţe-spikerı : «Biz bölä kanonu gördük Tirolün üülen tarafında. Onnar çoktan bu yolu ayırdılar. Onnar kendi annaşmaklarını çoktan saytlarında erleştirerlär. Ko herbir insan bilsin nereyi para harcanȇr . Sormasınnar neçin benzinı bu kadar paraya satın aldılar? Onuştan da peydalandı ideyä bölä kanon kabletmää».
«Devlet uurunda tenderların giçirilmesi için Gagauziyada» Kanonu Gagauziya Halk topluşu deputatları ilk okumakta kablettilär.
Источник grt.md 17.10.2022