Desant veterannarı Komratta kutladılar Hava desant askerleri gününü
Maavi beretlarlan hem koraflı maykalarlan. Harman ayın 2-dä desant asker veterannarı kendi profesional yortusunu nışannadılar. Veterannar desant askerlerina deyni yazılmış «Sineva» türkünün avtorun İvan Zdravkovun anmak taşına çiçekleri koydular. Ondan sora Prorok İliyanın adına klisesindä Komratta yortulu liturgiyada pay aldılar, 2-ci dünnä cengin payalannarına adalı memorialın yanında marşlan geçtilär hem patredä çıktılar.
Adetçä desant asker veterannarın «Sineva» türkünün avtorun İvan Zdravkovun anmak taşın yanında toplandılar, angısı Komrat koledjın duvarında koyulu. Hepsi bu insan desant askerliini geçti Sovet birliin vakıdında.
Desant asker veteranı Viktor Drangoz maasuz bölümdä askerliini yaptı, rotanın önemli tehnik uzmanıydı. O nışannadı, ki her yıl askerlär bilä toplanȇrlar, ki bu vakıdı aklına getirmää hem geçinmiş asker kafadarlarını aanmaa. Büünkü gün desant askerlerin veterannarın birliindä 50 zeedä pay alanı.
VİKTOR DRANGOZ, desant asker veteranı: «Bizim rotamızdan veterannar büünkü gün cenktä bulunȇrlar, iki tarafta da cenk ederlär. Kimisi, angısınnan bän askerliimi yaptım, öldürüldü. Bu cenk kimseyä diil lääzım. Acȇȇr canım, ani hepsi bu olȇr. Allah korusun bizi bu beladan, neçin ki biz dä desant asker veterannarıyız. Ama er lääzım olarsaydı, biz Vatanımızı koruyacez».
Başküüyün primarı Sergey Sapunji hep ölä desant asker veteranı. O paylaştı, ani bu yortu yardım eder birleştirmää hepsi veterannarı.
SERGEY SAPUNJI, desant asker veteranı: «Desant askerleri o kardaşlık, bu büük sorumnuk hem borç. İsterim desant askerlerini bu yortuylan kutlamaa kim Usuriysk kasabasında askerliiyni geçti. Düşünerim, ki slujbanın iki yılı bütün yaşamaya kalacek hepsi veterannarın aklılarında».
Veteran İvan Kılçik Krımda desant askerliini yaptı.
İVANKILÇIK, desant asker veteranı: «Bizdä maasuz brigadamız vardı. Pek sevinerim, ani askerliimi kär desanturada geçtim».
Desant olarak askerliinini yaptı Gagauziyanın patriotu Leonid Dobrov da.
LEONİD DOBROV, desant asker veteranı: «O yıllar armatacılık zordu. Desant askerlii sa taa da zordu. Her sabaa 6 kilometra kaçardık».
Sabaalen «Sineva» türküsünün avtorun İvan Zdravkovun anmak taşına çiçekleri koyduynan, sora veterannar ayozlu İliya adına klisesindä liturgiyada pay aldılar. Ondan sora da hepsi askerleri anmaa deyni veterannar dolayladılar 2-ci dünnä cengin payalannarına memorialını marşlan.
Источник grt.md
