Deputatlar: “Gagauziyanın baş kanonuna diişilmeklär lääzım Komstituţiyada yazılsınnar”
Gagauziya Halk Topluşu (GHT) deputatları Sergey Çimpoeş, Georgiy Leyçu, hem Aleksandr Tarnavskiy press-konferentiya verdilär, neredä parlament arası grupanın işi için annatılar, Bakannık Komitetin işindä yanışlıkları için annattılar hem nesoy diişilmekleri teklif ederlär deputatlar Gagauziyanın baş kanonuna giriştirmää ki ileri dooru onnar yazılsın devletin konstituţiyasına.
Kanondakı organın deputatı Sergey Çimpoeş annatı, ani 2015 yıldan deputatlar parlament arası grupasının işindä pay alȇrlar. En önemli problema, urguladı deputat, o, ani merkez kuvetleri saymȇrlar avtonomiyayi politika uurunda. Sergey Çimpoeş çizgiledi, ani evropadakı kurumnarın, Evropa birliin, Rusiya devletin, Türkiyanın pay almasınnan 1994 yılda Gagauziyanın yaşayannarı avtonomiyayi kablettilär. O düşüner ki avtonomiyanın ilk günnerindän politiklär kimi yanışlıkları yapardılar. Hepsi kuralları, urguladı Çimpoeş, Kişinöv belli edärdi.
SERGEY ÇİMPOEŞ, GHT deputatı: «Pek çok yanışlık yapıldı avtonomiyayı aslıya çıkararkana. İlk gündän Parlamentin kararları Gagauziyanın baş kanonunda bakılmȇr. 1994 yılda, açan Parlament bu kanonu kabletti, taa bir karar kabledildiydi, angısına görä hükümet lääzımdı kendi normativ aktlarını bakarak Gagauziyanın baş kanonuna görä diiştirsin».
Sölärkana avtonomiya politikıcacıların yanışlıkları için, deputat nışannadı, ki bitki yıllar onnarın aralarında bu soruşlarda birlik yok, bundan kaarä bakannık komitetindän dä yardım yok.
SERGEY ÇİMPOEŞ, GHT deputatı: «Biz bileriz nicä avtonomiya vergi sistemasını kaybetti, hem dekonţentraţiya kurumnarını da. Kendi bakannık komiteti prost gosterdi kendisini nicä Moldovanın kuvetlerin önündä, ölä bütünnä cümnenin önündä dä korrupţiya skandalların beterinä. Neçin ki bizim birleşik sesimiz taa üüsek lääzım olsun ki bizi işitsinär hem başarları kabledelim».
Sergey Çimpoeş haberledi, ki avtonomiyanın kuvetleri isterlär devletin kuvetlerindän 5 erli kvotayi Parlamenttä Gagauziya için.
GHT başın yardımcısı Georgiy Leyçu nışannadı, ki Gagauziyanın baş kanonun 27 statyasına kimi diyşilmeklär lääzım giriştirilsin.
GEORGİY LEYÇU, GHT başın yardımcısı: «Bän nışannȇrım ki bu formulirovka dünnä arası ekspetlärlän hem Evropa nasaatınnan kabledildi. Birkaç vakıttan sora bizä başka variant verildi. Şindiyädän soruşun bakılması hep kalmış erdä bulunȇr».
Bundan kaarä Georgiy Leyçu söledi, ani er Moldovanın hükümedi ileri dä saymayacek avtonomiyanın tekliflerini, o zaman avtonomiya da prezident seçimnerindä pay almayacek.
GHT başın yardımcısı Aleksandr Tarnavskiy paylaştı ideyalan Moldovanın prezidentin hem parlamentin başın uurlarında maasuz komisiyanın kurulması için, angısı zaanatlanacek devletin konstituţiyasına diyşilmeklerinnän, baalı Gagauziyanın ayırı hak statusunnan.
ALEKSANDR TARNAVSKİY, GHT başın yardımcısı: «Biz isteriz sölemää, ani bakmayarak ona, kabledilecek mi bu soruş parlament arası grupasınnan, biz hep okadar Moldovanın prezidentinnän ya Parlamentin başınnan buluşarsaydık kollegalarlan bilä dokumenti hazırlayacez, ki maasuz komisiyayi kurmaa. Bizim neetimiz- devletin konstituţiyasına diyşilmekleri giriştirmää baalı Gagauziyanın baş kanonunnan».
GHT deputatı Aleksandr Tarnavskiy hep ölä annattı erli soţial bölümündä investiţiyaların kanonun için enidän başladılması için dä, angısına görä Gagauziya 17 milion ley kabledecek.
Источник grt.md
