Deputatlar başkanın vetosunu Bakannıklar için kanonuna geçemedilär
Gagauziyanın Halk Topluşun deputatları toplandılar maasuz oturuşa ki savaşmaa kabletmää başkannan geeri urulmuş kanonu veto adımamasınınnan.
Kanon, angısı baalı Gagauziyanın bakannıklarınnan, imzalanmadı başkannan da çevirildi geeri GHT-na kirez ayın 3-dä, nışannadı Başkan İşleri bakannıın öndercisinın yardımcısı Oksana Nedälko — Kalın.
“İlkin bakılan Bakannık Komiteti için kanona diyşilmeklerin geliştirmesi punktları girdilär Gagauziyanın bakannıkları kanonuna da. Kurala görä bu punktlar geeri urulduktan sora yok nicä koyulsunnar başka kanona taa 3 ay. Bu vakıt orak ayın 19-da tamannanȇr”, — nışannadı Oksana Nedälko — Kalın.
Gagauziyanın başkan yardımcısı Olesä Tanasoglo nışannadı, ani bu kanon yazılarkana esaba alınmadılar bakannıkların iş özellikleri.
“En azdan 11 bakannık: saalık uurunda, üüretim uurunda h.b. Herbirin onnarın kendi özellikeri var, onnar pek ayırılȇrlar. Üüretim uuru ayırılȇr kanon koruması uurundan. İsteerim esaba almaa, ani hiç bir dä bakannıklan işlenilmedi hem esaba alınmadılar bu özelliklär”, — söledi Olesä Tanasoglo.
GHT deputatı Sergey Çimpoeş nışannadı, ani bakannık Komiteti neetlän korumaa kendi istediklerini, oynȇȇr bu kanonnan.
“Bakannık Komiteti neetlän korumaa kendi istediklerini, oynȇȇr bu kanonnan. İsteerim çekmää yaşayannarın dikkatlıını, ani biz bu kanonu kabledärkana istedik korumaa 50 mln ley, istedik doorutmaa onnarı yaşayannara yardım etmää deyni”, — söledi Sergey Çimpoeş.
“Bän esaba aldım, ani kanon hiç okunulmamış ta. 24 yıl biz işledik Bakannık komiteti için kanonuna görä hem taa 24 yıl mı bölä işlemää isteeriz? Biz büün burada toplandık ki diiştirmää işleri Gagauziyada, yapmaa ölä, ani taa az para arcansın saaya hem sola”, — söledi GHT başın yardımcısı, deputat Georgiy Leyçu.
GHT başı Dmitriy Konstantinov nışannadı, ani deputatlar lääzım kanona görä herbir işi yapsınnar.
“Biz gelmedik burayı ellerimizi kaldırmaa sade onun için, ani bu iş bir kimseyä lääzım. Biz yapȇrız bir iş, biz isteeriz, ani yaşayannar görsünnär, ani biz onnara deyni işleeriz. Ozaman da hepsi islää olacȇk”, — söledi Dmitriy Konstantinov.
Bitki — bitkiya başkannan geeri urulan kanonun veto adımnaması için kendi seslerini verdilär sade 18 deputat, lääzımdı sa en az 22 ses.
Источник grt.md
