COVİD – 19 Gagauziyaya geeri döner: son durum nesoy
Gagauziyanın başkanı İrina Vlah buluştu regionun bolniţalarının hem saalık merkezlerinin öndercilerinnän. Laf gitti COVİD — 19 hastalıın yayılmasınnan Gagauziyada.
Gagauziyanın saalık bakanı açıkladı durumu, angısı baalı Covid — 19 hastalıın ilerlemesininnän MD hem Gagauziyada.
SVETLANA DULEVA, Gagauziyanın Saalık bakanı: “Orak ayın çeketmesindän uulaşmak olayları başladılar yavaş-yavaş zeedelenmää. Dün yapıldı 100 test, onnardan 23-çü pozitiv, uulaşmanın sayısı 58% zeedelendi”.
Komradın Cümnä saalık merkezin başı Tatyana Kuyjuklu nışannadı, ani ulaşannarın taa çoyu uşaklar.
TATYANA KUYJUKLU, Komradın Cümnä saalık merkezin başı: “Hastalar aşılanmadılar. Yaparak analiz, biz belli ettik, ani en ilkin hastalanȇrlar uşaklar sora da büüklär. Biz 27 tesr yaptık, onnardan 6-sı pozitiv, 21-ri negativ. Yaşayannar dinnenärkenä Türkiyedän hastalıı getirerlär. Cumnä transportunda da pek sık uulaşȇrlar”.
Alarak esaba hastalıın zeedelenmesini, Gagauziyanın kuvetleri seçtilär karar orak ayın 18-dän Komradın Covid bölümün işini enidän açmaa.
NİNA RAYLÄN, Komrat dolay bolniţanın önderci: “Dün seçildi karar açmaa erleri, neredä ilaçlanaceklar hem büüklär hem küçüklär. Herbir iş bunun için hazır. Uzmannar da bu iş için hazırlanȇrlar. Covid bölümündä var hepsi lääzımnı ilaçlar, tertiplär”.
Komrat kasabasının saalık merkezin öndercisi İrina Todorova nışannadı, ani 2 aftanın süresindä poliklinikada belli edildi 32 uulaşmak olayı.
İRİNA TODOROVA, Komrat kasabasının saalık merkezin öndercisi: “Hastaların 3-cü payı dinnenmektän geldilär, onnarın da 3-cü payı uşaklar. İlk dalgada uşaklar pek uulaşmazdılar, ama şindi durum başka. 32 hastanın arasında 4 mediţina uzmanı var. Hepsindä 2-är vakţina var, onuştan da hastalıı ilin geçirerlär”.
Çadırın bolniţasında orak ayında 252 test yapıldı, onnarın 28-zi pozitiv çıktı. Gagauziyanın başkanı teklif etti Mas Mediyaların yardımınnan annatmaa yaşayannara aşılamanın önemini. Hep ölä o teklif etti kısa zamanda toplamaa avtonomiyanın Hatalı Komissiyasının oturuşunu.
İRİNA VLAH, Gagauziyanın başkanı:“Lääzım sölemää dolayların öndercilerinä geçirsinnär toplantıları bücet kurumnarın izmetçilerininnän, iş adamnarınnan hem annatsınnar onnara aşılamanın önemi işin Covid 19 hastalıına karşı koymakta”.
Oturuşun süresindä nışannandı, ani hastalıın durumu kötüleşti aşılamak kompaniyasının bitmemezlii sebepindän. Gagauziyanın sade herbir 5-ci yaşayanı vakţina kabletti, hem ikinci vakţinayı koydurdular sade yaşayannarın 16%-di. Açıklandı soruş, angısı baalı mediţina kurumnarında maskaların taşımasınınnan.
Источник grt.md 19.07.2022