Çeşmäküüyüdä yarıda oluştu yangın
Çeşmäküüyün yarısında tutuştu kuru otlar. Yangın sebepleri diil belli. Nicä haberledi Moldovanın Hatalı olaylar için devlet inspekţiyası, bitki günnär kurtarıcılar sündürdülär ateşi 2 533 ektarda.
Yangın kızıştı birkaç erdä. Videoda görüner, neredä ateş kızışêr, nicä yangın maşinası sündürer ateşleri.
Korlar ayırı erlerä daalmadılar, çünkü ateşi sündürmää yardım ettilär yaşayannar, deyni kurtarmaa mezarın yanında bulunan yarıyı. Yangın başlamadan kurtarmak maşinası o erä yakındı, o üzerä hızlı hem kolay çıktı ateşin önünä.
Çeşmäküülülär nışannadılar, ani bölä hata ilk sefer oldu küüdä.
“Biz gübür bişey atmadık hiç bir zaman da, bu sade aşaadan geldi, orada tükenın yanında tutuşturdular gübürleri, da korlar daaldı bıyanı da, lüzgär hererdän çevirder, kuraklık ta gider”.
“Biz kontim bu mezarı paklêêrız, orada aaçlıktan kim öldü, onnar gömülü, ama eni mezarı herkezi kendibaşına tertipleer, o üzerä yok neredän olsun tolokalık, sade otlar kuru çukurda. Ama kim neredän geler, hiç şüpäm da yok, görmedim bişey. O şindi kızıştı, te kızışêr da, ayırı erlerdä”.
Çeşmäküün primarı Sofiya Jekova haberledi, ani küüdä lääzım korudulsun hem işledilsin depo, yangınnarı sündürmäk bölümü, çünkü Valkaneş kasabasından etiştirämeyeceklär gelmää kurtarıcılar — uzak.
Küüyün 2022 yıla bücetindän kesildi para birkaç cümnä uuruna vermää deyni. Diişilmeklär finans kesmesi için kabledildi taa hederlez ayın 1-dä bıldır. O üzerä Gagauziyanın primarlarının asoţiaţiyası teklif etti enidän başlatmıı brikaç cümnä programasını 2022 yılda. Onnarın arasında “Aydın küü”, “Saalıklı evlat boyları” hem depo para geçirmeleri.
“Bizim DEPO kabledärdi bütündän 160 bin leya yakın, ama o paralara girärdilär maasus transfertlar da. Bizä lääzım taa bir işçi. Bizä sıra gelecek bu yıl kendibaşımıza artırmaa paraları, da makar 80-90 bin ley geçirmää, çünkü nicä gördük, var büük risklar, büünkü olay da gösterdi, DEPO yok nasıl yok edilsin küüdän, kuraklık da varkana”, — açıkladı primar Sofiya Jekova.
Hatalı olaylardan kurtarıcılar danışȇrlar yaşayannara yakmasınnar gübürleri, çünkü korlar lüzgärlı havada daalêrlar, ateş sora tez yayılȇr.
Şindiki kuraklık hem yaamursuz havada tä bölä hatalı olaylar sıklaştılar. Yanêr meralar, kırlar, daalar, ev çorbacılıkları da. Bölä olaylarda vatandaşlar hemen lääzım telefondan haberlesinnär uzmannarı 112 nomerindän.
Источник grt.md
