Çeşmä küüyündä Aaçlık kurbannarını anmak sırası
Canavar ayın (oktäbri) 19-da, Gagauziyanın “Aaçlık kurbannarını Anmak Günündä”,
Çeşmä küüyün primariyasının çalışmasınnan, bu küüyün 1946-1947 yıllarda Aaçlık kurbannarını Anmak Memorialında bu kurbannarı anmak sırası oldu.
Anmak sıranın başında, küü lițeyinin gagauz dilindä hem literaturasında üürediciykanın Elena Nikolaevna KÖSÄnin zaametinnän üürencilär, ellerindä aaçlıkta diri kalan dedelerinin patretlerini tutarak, okudular onnarın 1946-1947 yıllarda zorlan yapılan aaçlık için annatmalarını.
Bu aar hem yaslı gündä söz tutan Çeşmä küüyün primarı Sofiya JEKOVA şükür etti küülülerä hem o insannara, angılarının yardımınnan hem parasınnan kuruldu bu Anmak memorialı (bak: http://anasozu.com/cesmakuuyunda-aaclik-kurbannarini-anmak-memoriali-acildi/), ani verer kolayını daymalarda anmaa aaçlaa kurban olan insannarı. Neyi, yaşlarlan gözlerindä, bir susmak hem saygı minudunnan yaptılar hepsi o insannar, ani toplandıydılar bu yaslı sıraya.
Anmak sırasında kendi duygularınnan çeşmäküülülerin önündä nasaat ettilär Çeşmä küüyündän Gagauziya Halk Topluşun VI-cı toplumun deputatı Ekaterina JEKOVA hem yazıcı Konstantin KURDOGLU.
Bu memorialda toplu mezarda gömülän 1946-1947 yıllarda aaçlaa kurban olan bir bindän zeedä kişinin cannarı için küüyü Büük Panaiya klisesinin popazı Väçeslav slujba yaptı hem koliva kaldırdı.
Slujbadan sora, 1946-1947 yıllarda Aaçlık kurbannarını anmak için toplanan insannar Anmak memorialına saygıylan çiçek koydular.
Not. 1946-1947 yıllarda gagauzlara karşı zorlan yapılan aaçlıkta gagauz küülerindä 40-60% insan bu aaçlaa kurban oldu.
Patretlär: cesma.md
Источник anasozu.com
