CENK: Rusiya Ukraynanın üstünä üüşer
Küçük ayın (fevral) 24-dä, Rusiya Prezidentı Vladimir PUTİNın emirinä görä, rus askeri başlattı Ukraynaya karşı ölä denilän “maasuz asker operațiyası”nı, ama halizdän Rusiya kolmşu devletinin, Ukraynanın, üüstünä açıktan bir cenklän üüştü.
Küçük ayın (fevral) 24-dä, çin sabaalendän, Ukraynanın Kiyev, Harkov, Dnepr, Odesa, Mareupol gibi kasabaların yakınnarına yaadı rus raketaları, angıları urdular asker infrastukturası obyektlarına. Rusiyanın korunmak ministerkiin ofițial açıklamasına görä onnar darmadaan ettilär “Ukraynanın 74 obyektını, angılarının arasında var 11 aerodrom, 3 kamanda punktu, deniz-asker bazası, C-300 hem Buk-M1 zenitka kompleksların 18 radiolokațiya stanțiyası, asker eraplannarı, asker vertolötları, 4 “Bayraktar” razvedka hem urucu dronnarı. Bundan sora da Ukraynanın her tarafından Rusiyanın tankları, bronemaşınaları hem askerleri bu devletin en büük kasabalarına hem strategiyalı obyektların üstünä gelmää başladılar. Rus desantnikleri, havadan paraşutalarlan inip, Dnepr deresinin strategiyalı köprüsünü aldılar hem Kiyavın yakınnarında olan aeroportu.
Bundan kaarä, Belarusiya tarafından girän rus tankları hem asker Çernobıl AESını elä geçirdilär da oradan savaştılar Kiyeva yollanmaa.
Bumbalardan hem raketalardan insannar Kievın (bak: burada) hem Harkovun (bak: burada) metrolarında saklanmaa savaşêrlar.
Vladimir PUTİN Ukraynaya karşı bu cengi başlattı ondan sora, açan tanıdı Donețk hem Lugansk Halk Respeblikalarını, ani Ukraynada kendilerin baamsızlıını 2014-cü yılda dünneyä bildirdilär. Bu cengä Vladimir PUTİN “Donețk hem Lugansk Halk Respeblikalarını korumak maasuz asker operațiyası” deer, ama belli, ani bu 1941 yılını aklımıza getirän bir cenktir.
Ukrayna devlet kuvetlerinin açıklamasına görä, bu cengin ilk günündä Ukrayna 137 askerini kaybetti hem kırka yakın țivil vatandaşını.
Bu gecä Ukrayna Prezidentı Vladimir ZEKENSKİY imzaladı İzini, angısına görä devlettä 90 günnük bütünnä mobilizațiya yapılêr.
Açıklanêr, ani Rusiyanın 48 kasabasında bu cengä karşı protestlar geçti hem o protestlara katılan 1746 kişi tutuklandı.
Moldovada Rusiya Büükelçiliin önündä dä bu cengä karşı protestlar oldu.
Moldova, Ukraynada gidän cenk sebepinnän, memlekettä 60 günä sıradakı taa bir üstolan durum kurdu.
Küçük ayın (fevral) 25 sabaası Uktaynadan gelän haberlerä görä Ukrayna hem Rusiya askerleri arasına düüş gider. Rusiya Kievı, Harkovu, Nikolaeva, Odesa kasabalarını bombalêr. Țivil insannarın arasında yaralı hem ölü var.
Sıradan insannar savaşêrlar kasabalardan uzaklaşmaa, kimiliri Moldovaya hem Romıniyaya kaçêrlar.
Источник anasozu.com
