Cendem olsun cenk hem cengi çekettirernnär!
Ukraynada Rusiyanın agresiyasına karşı gidän cenk böldü dünney hem insanarı ikiya – onnara, kim seviner Rusiyanın Ukraynaya cenklän girmesini hem Rusiyadan tutêr, hem onnara, kim bu cengä karşı kalktı da.
Bu bölünmäk gagauzlara da urdu. Diil Ukraynada yaşayan gagauzlara, ama Moldovada olannara. Taa çoyu buna “cendem olsun cenk hem cengi çekettirernnär” deer, ama bunnar sıradadan insannar. Kuvettä bulunannar sa, yapêrlar kendilerini, en aazdan, ani Ukraynada hiç bişey olmêêr, ama en çoktan buz gibi kannanan görmemezliktän gelerlär. Büünkü günädän Gagauziyanın Başkanı da bu konuda görmemezlik durumunu aldı. Kimi palilär dä salêrlar hem sevinerlär, ani “Rusiya, Ukrayna üstünä üüşeräk, pek islää yapêr”. Aslısı sa başka: Ukraynada kabaatsız insannar kan içindä, Rusiyanın raketaları hem bombaları kasabalara düşerlär, insannarı amansız öldürerlär.
Büük bela!!!
Belliki, sıcak kreslolarda hem raatlı lüks maşinalarda oturan, Gagauziyanın gagauz olmayan başkannarına, o Ukrayna halkının, ukraynalı gagauzların sancısını hem belasını annamaa zor. Bu onnarın hiç umurunda da diil! Başkannar orada gidän cengä buz gibi cannarlan hem don bakışlarlan bakêrlar.
Makarki biraz onnarın gözlerini açmaa deyni, çünkü buz olan cannarını hep okadar eridämäzsin, büün tiparlêêrız Ukrayna Gagauzlar Birliin başkanından Vasiliy KELİOGLUdan redakțiyamıza gelän peetini. Tiparlêêrız ölä, nicä Canabisi yazmış (burnuları gökä gezän “gagauz literatura kritikacıları” aazlarını kapasınnar!). Bu peet – CENGİN içindän CENGÄ bakış hem gagauzlara çaarış. Unutmayın, Vasi KELİOGLU kaçmadı Ukraynadan, ama oradakı binnärlän gagauzlarlan bilä, Vatanını korumak için, güüslän cengä karşı kalktı.
Akademik hem poet Todur ZANET, Gagauz Millli Gimnanın avtoru
Kim deycek ona ETEER? Hiç beklemärdik cengi, Ansızına o geldi, Bizim sert askerinä, Putinin beterinä!
İlk günnär koptu ürääm, Bombadan kastı kulaam, Korkudan sindi uşaam, İnanamadı kafam,
Topladım bän kendimi, Hazırladım tüfeemi, Çaardım genç çocukları, Aldım ilk soruları:
Kim ateş etmää bileer? Kan durgutmaa becereer? Kameralar kimdä var? Hem ilaçlar ne kadar?
Testere – açlаа yıkmaa? İmek, su – çok dayanmaa? Kum hem taş – duvar örmää? Yaa, benzin – tank patlatmaa?
Yıvın-yıvın erleşti, Halk sıkı pek birleşti, Komuşu kardaş oldu, Zorumda hep bulundu,
Öldürüldü çok insan, Üklü karı sıradan, Can verdi – koca baarar! Evlär daaldı, okullar!
Yavrular üüsüz kaldı, Analar oolsuz kaldı, Yaralanmış – bir tepä, Kaçaklar sa – bin tepä,
Af edämäm bän rusa, O geldi bizi urmaa, Bilmäz, sinsor hem yokçaaz, Cendemä biz yollaycaaz,
Askerlär bizim kaavi, Bayraamız sarı-maavi, Topraamız pek verimni – Göz koydu rus bezbelli,
Enseyämäz o bizi, Patriot dizi-dizi, Korêêr kendi evini, Dünnya verer elini,
Salt halkım bir tarafta, Umut eriy her hafta, Ani akıllanacak, Faşistä karşı çıkçak.
O bela hep getirer, Kim deycek ona ETEER? Kurtaracak hepsini, Gençlerin geleceeni,
Helal olsun Milletä! Ukraina devlete! Kahraman çocuklara! Ölümdän korkmazlara!
Direnerlär her erdä, Küüdä olsun, deredä, Saalık sizä hem sabır, Allaa getirmesin kahır! Vasili KELİOGLU, Ukrayina, Kiev
Источник anasozu.com 17.03.2022