Caltayda gimnaziyasında yazıcıylan buluşmak hem “Altın ellär” sergisi
Geçennerdä, Gagauziyada yapılan “Ana dili” yortusu çerçevesindä, Caltayı gimnaziyasında iki önemni sıra oldu: Çiçek ayın (aprel) 7-dä gimnaziyanın 5-ci klasın üürencileri buluştular yazıcıylan hem akademiklän Todur ZANETlän hem Çiçek ayın (aprel) 13-dä gimnaziyada yapıldı “Altın ellär” sergisi. İkisini da bu sıraları hazırladı gimnaziyanın iştä hem ustalıkta pedagogu Evdokiya Petrovna PETKOVİÇ.
Yazıcı hem akademik Todur ZANETlän buluşmada Canabisi annattı uşaklara gagauz literaturası için hem cuvap verdi 5-ci klasın üürencileri tarafından koyulan soruşlara.
Çiçek ayın (aprel) 13-dä olan “Altın ellär” sergisindä sergilendi üürencilerin ellerinnän yapılan
pek meraklı işlar: sayma dikmeleri, yazma dikmeleri, yapaalan düümä işlar, yalabık boncucaklan hem sedefçiklärlän yapılma kartinalar, ellän dikma ikonalar, tuzlu hamurdan işlar, resimnar, tafta üzerindä yakma yaratmaklar hem taa cok gözäl yaratmalar, ani gözün şaşêr onnara.
Sergidän kaarä uşaklar annattılar türlü gözäl peetlär ustalıklar için, çaldılar gözäl türkülär, türkülerdä dä andılar ustalıkları.
Edinci klasın uurencileri gösterdilär meraklı sțenka ustalıklar hem şkolanın uşakları için.
Gözäl maanilar çaldılar altıncı klasın kızları, neredä annattılar zanaatlar için.
Besinci klasın uurencileri çaldılar türküyü “Yaşasın dünnedä gözellik”, angısını yazdı gimnaziyanın iştä hem ustalıkta pedagogu Evdokiya Petrovna PETKOVİÇ:
1. Görün bizim gözelliimizi Bizim altın ellerimizi Bu gözellää bakarız biz Şaşar ona gözlerimiz.
Refren: Allaa versin hepsinä – İlinnik ellerinä. Havezlik ustalıımaa İnsanı sevindirmää.
2. Düümää, örmää hem dikmää İiyi hızlıca çevirmää İplikleri dä kıvratmaa Düzenä onnarı kakmaa.
Refren.
3. Cok ustalık becereriz biz Tertip onnarı yapaarız İnsanın gözleri şaşsın Bizä dä maıyllıı gitsin.
Refren.
4. Basılmasın bu gözellik İnsanda olsun havezlik Altın ellär işlesinnär Gagauzluu da kaldırsınnar.
Bu iki sırada da pay aldı Caltay gimnaziyasının direktoru Natalya İvanovna DEMİR, angısı şükür etti bizim anılmış yazıcımıza hem “Altın ellär” sergisindä metetti usakları hem onnarın sergisini, peetlerini, türkülerini da dedi ileri dooru da hep bölä gözäl sergilär kursunnar, çalsınnar hem annatsınnar.
“Altın ellär” sergisi durdu gimnaziyada bütün afta, da usaklar mayıl oldular kendi yaptıklarına!
Tatyana Georgievna MARKOVA, Caltay gimnaziyasının bibliotekacıykası
Источник anasozu.com
