Çadırda Hederlez yortusunun kutlamak sırasında gagauzlar eski halk oyunnarını gösterdilär
Halk oyunnarı eveldän türk halkların baş dinnemäk zanaatlarıydılar. Şindi sa az kaldı, kim biler nesoy onnarı oynamaa. Var gagauzlar, angıları koruttular dedelerinin adetlerini bu uurda, da vererlär becermeklerini genç evlatlarına. Bu uurun özellii için hem derinnii için üürendi Anna Altıyeva.
Herbir milletin kultura özelliinä girer oyunnar. Böleliklän eveldän kalmış dinnemäk vakıdını geçirmää oyunnarın başında, nereyä katılarmış küçüü-büü. Çünkü onnarın yardımınnan terbiedilärmiş bölä becermeklär nicä: kuvet, sabur, hızlılık, dooruluk, aslılık hem çemriklik.
Milli gagauz oyunnarını gösterdilär Çadır kasabasında Hederlez- 2022 yortusunda. Meraklandırdı hepsini “Uzun Eşek” yarayışı. Kurallara görä oyuncular iki takım kurȇrlar. Birileri lääzım iilip, biri-birlerinin bellerindän bir sıraya dizilsinnär. Kalanı lääzım atlı pinsinnär, ama atlayarak.
“Aşık” oyunu motorikayı çalıştırêr. Burada 5 oyuncuya kadar diziler. Herbiri çalımnarını alsınnar lääzım, da bir atışta hepsi kemicekleri tutsunnar, toplasınnar, sora da tokatçaa atsınnar, kezlesinnär.
En büük dikatlıı musaafirlerdä çekti “Piliçik” oynusu. Burada 8-10 uşak bir çevereyä toplanıp, karşı-karşıya oturêrlar, bir ayakta, kalan pay alan, gezer basmaylan, ansızdan ayırıp, bir oturana koyêr, angısı esaba alıp, savaşêr etişmää atanını, ki onun erini kaplamasın.
Genç olannara deyni en meraklı oldu “Baaşış tekerlää”. Burada kuvet hem çemreklik büük rolü oynêêr. Sade en kaavileri tırmanabildilär dirään tepesinä, neredä tekerlek baaşışlarlan asılı.
“Filcan” oyunu zor, ama meraklı. İki olan dolu şaraplan filcannarlan fiçıda lääzım oynasınnar onu düşürmedään. Şarap diil lääzım ne taşsın, ne da dökülsün.
Hederlez 2022 yortusu gösterdi gagauzların milli oyunnarının deri maanalarını. Hep ölä gösterildi aklıyı çalıştıran oyun Kuran, kuvetleri belli edän Güreş yaraşması.
Dooru demiş uzmannar, ani herlim halkı tanımaya çalışarsadınız, ozaman esaba alınız, ne oyunnarı kullanêrlar onnarın uşakları. Böleliklän millet özellii herbirindä kurulêr kundaktan. Taa çoyu tabeetlär hem adetlär silinerlär, ama asirlärcä özellik herbir halkta korudulêr oyunnarda.
Источник grt.md
