Çadırda andılar 90-cı yıllarda öldürülmüş poliţiya izmetçisini Georgiy Sırtmaçı
30 yıl geeri Çadırda hatalı olay oldu, angısının beterinä poliţıya izmetçisi Georgiy Sırtmaç öldürüldü. Büün Çadır kasabasında anmak olayları geçti.
1992 ci yıl hederlez ayın 24-dü — gün, angısı doldurdu insannarın cannarını kahırlan. Büün dä onnarın gözleri yaşlan dolu hem cannarı aalȇr.
Diversant grupası o vakıt istedi patlatmaklan yoketmää Çadır kasabasının birkaç önemli obyektları. Poliţiya uzmanı Georgiy Sırtmaç o günü işläärdi. O durguttu bu insannarın maşınasını, onnar sa tüfektän urdular Georgiy Sırtmaçı. Canını vereräk Georgiy Sırtmaç engelledi büük belayı, angısı vardı nicä çok yaşamak alsın.
«Sırtmaçın hem poliţıya uzmannarın yaptıkları kalmadılar bir tarafta hem unudulmadılar. İi, ki hederlez ayın 24-dä onnarda oldu kolaylık diversiya oluşunu engellemää hem kurtardılar üzlän yaşamak, beki dä, binnän», — nışannadı Dmitriy Arabacı, Çadır dolayı iç işlerindä Ministerliin veteran kurumun başı.
«Bütün Gagauziyaya deyni Sırtmaç hem başka poliţıya uzmannarı kalacȇklar nicä haliz kahramannar, angıları kendi yaşamaklarını verdilär, ki biz uslulukta yaşayalım», — söledi İlya Stamat, Gagauziya iç işleri bakannıın ilk başı.
Gagauziyanın Başkanı İrina Vlah nışannadı, ani bakmayarak ona, ani 30 yıl geçti, Georgiy Sırtmaç hep ölä kaldı örnek herbirimizä deyni.
«Bizim borcumuz — aklımızda tutmaa kahramannıı hem yapmaa ölä, ani çirkin olaylar hiç bir sıra da tekralanmasınnar», — söledi başkan.
Çadır kasabasının primarı Anatoliy Topal nışannadı, ani Georgiy Sırtmaç bitki kıpımnaradan kendi yaşamasında işini üüsek uurda götürdü.
«Pek çok büün görerim genç olan aramızda. Sevinerim onnara. Onnar lääzım bilsinnär o günnär için. İstoriyamızı diil lääzım unudalım. Olmasın dünnedä cenk», — nışannadı Anatoliy Topal.
Gagauziya Halk topluşu deputatı hem Georgiy Sırtmaçın dostu Nikolay İvançuk nışannadı, ani Çadır — Lunga muniţıpiyasının poliţıya uzmannarını lääzım tutmaa aklımızda hem saygı gütmää te onnara, kim yaşȇȇr.
«Georgiy İvanoviç Sırtmaç durguttu çirkin olayları kendi iş ortaklarınnan. Yazık, ani en ii insannar erken giderlär, bizim daavamız onnarı tutmaa aklımızda», — söledi Nikolay İvançuk.
Georgiy Sırtmaçın karısı Mariya Sırtmaç söledi, ani hederlez ayın 24-dü onnara deyni kahırlı gün.
«Vakıt pek tez geçeer, ama unudulmȇȇr te onnar, kim yaşamasını verdi insannar için. Biz hoduluz, ani o bizdä vardı», — söledi Mariya Sırtmaç.
Georgiy Sırtmaç «Ştefan çel Mare» hem «Gagauz Eri» ordennarını diveç kabletti. Çadırda onun adı veildi iki sokaa, gimnaziyaya, yaslaya hem çeşmeyä.
Источник grt.md
