Çadirda 40-50-cı yılarda olmuş repressiyaların kurbannarını andılar
Orak ayın 6-da Çadır kasabasında repressiyalar kurbannarını andılar. Moldovada bu gün 2016-yıldan bakılêr. Bizim korrespondentımız mitingı hazırlayannarınnan hem pay alarınnan buluştu.
Orak ayın 6-da 1949 yılda çeketti «Üülen bölgesi» operaţiyası, angısının betterinä Bessarabiyadan repressiyların altına düştü hem Sibirä yollandırıldı 35 bin kişi. Bu binnärlän insanarın yaşamasını diişdirdi. Bilim adamnarı büün taa açêrlar o vakıdın kara sayfalarını. İnsannar, kim geçirmişl hem görmüş o vakıtları, hem mitingta pay alannar büük acıylan canında hem yaşlarlan gözlerindä annadêrlar o vakıtlar için. Ölä insannarın biri Evgeniy Stifoglo, onu 1949 yılda Sibirä yolladılar.
«Karannıkta geldilär, kaldırdılar döşektän, pek aaz vakıt verildi toplanmaa, benimlän bilä mamuydu. Ama o çirkin vakıtlarda da vardı islää insannar da. Geçärkänä bolnițanın yanından, neredä mamu işlärdi, orada vardı bir çuval un, da o bakıçı, kim geldi bizi kaldırmaa, braktı onu almaa. Tä bu iş kurtardı bizim yaşamamızı yolda», — paylaştı aklına getirmelärlän Evgeniy Stifoglo.
Stepan Lazarevın malisini hem dädusunu Sibirä yolladılar.
«Bu gündä çok kerä başka yıllar da buluşardık burada. Bän görärdim bizim kardaşları, kızkardaşları, insannarı , nasıl bulundular o vakıtlar uzak erlerdä. Çok vardık biz, çok vakıt geçti, bän görerim azaldı bizim sıramız», — söledi Stepan Lazarev.
Çadır dolay administraţiyasının başının yardımcısı Georgiy Radov nışannadı bu mitingın önemliini.
«Hepsi, kim büün saymadı zaametini, geldi bu anmak taşına, isteeriz kendi buluşmamızlan burada göstermää, ani biz unutmadık bu çirkin günneri. Açan kuvetlär, bakmadaan, ani insanda yok bişey , koyardılar onnarı nicä kulak».
Erli kuvetlär, musaafirlär, hem kasabanın yaşayannarı mum yakarak, çiçek koyarak anmak taşına andılar represiyalar kurbannarını.
«Bu bizim istoriyamız, onu yok nica silmää. Varsınız siz, kim biler, gördü o çirkin vakıtları, angıları azalttı yaşayannarı bizim Bucak tarafında. Saa olun, ani dayandınız, geçirdiniz o zor vakıtları, — danıştı hepsinä Çadır kasabasının başı Anatoliy Topal.
Mitingın kurucusu Svetlana Kapanji umutlanêr, ani unudulmayacek o zamannar.
«Pek zordu vakıtlar, insannara da pek zordu. Biz istämeeriz başka bölä çirkin sayfaları, istämeeriz, ki bizim analarımız-bobalarımız geçirsin bu işleri. Benim malim, dädum aşırıda öldü. Pek büük kahır kalmaa kendi topraksız, ana tarafsız», — söledi Svetlana Kapanji.
Yazıcı Konstantin Kurdoglo çok yazdı o vakıtlar için. O sayêr, ani bizim borcumuz aklımızda tutmaa hem bilmää o sayfaları.
«Her yıl biz burada toplanêrız, bu pek önemli bir iş. Biz lääzım tutalım aklımızda o işleri, da hiç bir zaman unutmayalım. Tutmadaan aklında, ne oldu geçmştä, geleceemiz olmayacek. Bizim borcumuza düştü bu iş aklımızda tutmaa o vakıtları».
Miting Çadır muniţipiyasında geçeer 2006 yıldan.
Источник grt.md
