Çadır-Lungada mitinga çıkmış insannar isteerlär işitsinnär onnarin kahırlarnı
Geçän pazar, harman ayın 7-dä, Çadır kasabasında geçti taa bir miting, zor vakıtlar devlettä kahırlandırêr insannarı. Çekim grupamız lafetti kasabasının yaşayannarınnan da üürendi onnarın bakışlarını.
Büük paalar gaza, şafka, mallara hem izmetlerä — hepsi bunnar dürter insannarı mitinglara çıkmaa. Her keret mitingta pay alannarın sayısı taa zeedelener, insannar danışêr devletin baş kuvetlerinä yaşayannara yakın olsunnar.
«Bu ihtiyär insannar 1,5 binä pensiyasını yok nereyi çeksin, o tarafa mı, bu tarafa mı, insan aç gezer. Bakêrsın babulara olmuş iki kat, gençlär düşünerlär gitmää, ama o insan nereyi gidecek? O kalêr burada, o deer: “Benim evim burada, bän gitmeyecäm birercää».
«Şindi annaşılêr, ama kışa açan girecez taa belli olacek. Gazı şindi etiştireriz ödemää, nicä pensiyayı kablederiz, 300 — 400 ley sayıklȇȇrız. Sıcak suyu yısıdȇrız güneştä da yıkanêrız, koşmêêrız kotölu».
«Etiştirämeeriz, ondan alêrız ödünç, bundan alêrız. Bir delii kaparsaydın dokuz açılêr. Nicä kletkadayız, buuêrlar bizi, bilmeerim nasıl biz çıkacez bu situaţiyadan».
“Umutlanêrız, ani bizi işideceklär. Çok mitinglar geçer, insannar kahırlanêrlar ne olacek ileriya dooru. Bizdä yok büük paralar bu paaların üstünä çıkmaa, insannar pek azaldı, zor oldu yaşamak».
Mitingın kurucuları sevinerlär, ani insannar çıkêrlar mitinglara, çünkü onnar sayȇrlar, ani bu zor vakıtta lääzım sadece birliktä olmaa, ki problemaları çözmää.
MİHAİL KIVIRJIK, cümnä aktivisti: «Biz isteeriz göstermää, ani bu iş yapılêr hepsinä deyni, kasabanın yaşayannarına, Gagauziyanın hem bütün Moldovanın. Biz birini ayırmêêrız, biz bir vatan, hepsimizdä bizdä şindi bir acı».
MİHAİL VLAH, cümnä aktivisti: «Bu Gagaziyada 5-ci miting, çok türlü mitinglar yaptık. Ani uyansın Gagauziya, kalkınsın insan, şükür, ani çikêrsınız. Bizim dedelerimiz kurdu bizim Gagauziyamızı , onnar hep kendi ana erinnän biläydilär».
Mitingta pay aldı Çadır kasabasından deputat Nikolay İvançuk hem başka Halk Topluşun deputatları. Onnar paylaştılar kendi bakışınnan bu krizis için.
NİKOLAY İVANÇUK, Gagauziya Halk Topluşun deputatı: «Bizdä var birkaç iniţiativa, angıları üzä çıkarsaydı var nicä olacek biraz paraylan yardım edelim bizim insannarımıza kış vakıdında. Ani biraz yardım olsun gazı ödemää».
GRİGORİY LEYÇU, Gagauziya Halk Topluşun deputatı: «Biz hazırlêêrız birkaç kanon, angıları biraz lääzım yardım etsin bizim insana bu zor vakıtta. Paraylan biraz yardım etmää insana, biz umutlanêêrız, ani tezdä onnar çıkacek üzä».
SERGEY ÇİMPOEŞ, Gagauziya Halk Topluşun deputatı: «Biz isteeriz hepsinnän yaşamaa uslulukta, isteeriz, ani bizi saysınnar. Biz Gagauziya için hem Moldova için isteeriz, ani Moldovada Gagauz Halkını saysınnar».
Mitingta pay aldı Gagauziyanın eski Başkanı Mihail Formuzal.
MİHAİL FORMUZAL, Gagauziyanın eks-Başkanı: “Şindi önemli, ki Gagauziyanın kuvetleri savaşsınnar annaşmaa da çözmää gaz problemasını. Sayȇrım, ani bu işi var nicä yapmaa, lääzımsaydı, bän var nicä yardım edeyim onnara çözmää bu problemayı».
Çadır kasabasından kaarä Kongaz küüyündä dä geçti miting büük paalar için.
Источник grt.md 08.08.2022