Çadir-lunga kasabasına uşak oyun festivali topladı kollektivleri Moldovanın türlü erlerdän
Çadır kasabasında geçti uşak oyun kollektivlerin festivali. Festivalin programması genişti, uşaklar diil sade kendi talantlarını gösterdilär sţenada, ama vakıdı da şen geçirdilär.
Festival baalıydı Çadır kasabasında 15 yıl işleyän «Çüdo — deti» uşak oyun kollektivin yıldönümünä. Onun başı hem horeografı Tatyana Yalama annatı, nica kuruldu kollektiv.
«Kollektiv «Çüdo — deti» kuruldu 2007 yılda. Bu adı biz istedik koymaa, açan bir festivaldä bizim kollektiv pek gözä oynadı bir oyunu, ozmandan beeri kaldı bu ad», — açıkladı Tatyana Yalama.
Uşaklar, angıları pay aldılar festivaldä, sevinerlär, ani onnarı çardılar. Herkeret, her bir festivalda onnar kablederlär eni emoţiyaları, dostlaşȇrlar biri – birinnän.
«Biz çok saa ol söleriz, ani bizi çardılar bu yortuya. Biz isteriz kutlamaa bu gözäl yortuylan bizim kollektivdän hepsi yaşayannarı».
«Biz sevineriz, ani bizi çardılar, biz pay alêrız bu festivaldä Çadır-Lungada, da biz çok kutlêrız hepsi insannarı».
«Bän oynȇȇrım gagauz ansamblisindä «Yıldızlar» 7 yıl. Bän pek sevindim, ani bizi gene çardılar bu festivalä».
Gagauziyanın Başkanı İrina Vlah şükür etti hepsinä, kim yardım etti geçirmää festivali.
«Bän isterim nışannamaa, ani bizä pek önemli, ki bizim adetlar ilerlesin. Adetlär o bizim kultura , o paalı bir iş, korurayak angısını biz gün-gündän ilerlederiz bizim vatanımızı», — nışanadı Başkan.
“At – Prolin” kurumun başı, resimci Konstantin Keleş gösterdi uşaklara yaratmalarını hem annattı beygirlär için. Uşaklar büük meraklan baktılar hem sesledilär.
«Bän bu resimneri pek beendim, hepsi pek gözäl”.
«Bendä evdä da var bu resimcinin resimi. Pek severim nicä o resimneri yapêr ,beygirleri gözäl gösterer, pek beendim».
Festivalin kurucuları şükür ettilär hepsini, kim pay aldı bu festivaldä . Onnar çigiledilär, ani bölä festivallär yardım eder biri-birimizi üürenmä.
«Bölä vestivallär pek önemli, çünkü bütün Moldovadan uşaklar var niça gelsin, ürensin Gagauzların kulturasını ,bizim kasabayı. Kollektivların öndercileri var niça paylaşsınnar biri-birinnän bilgilärnän», — söledi Çadır kasabasının birleşik Kultura merkezinnin başı Janna Paşali.
«Bizdä büün çok musafir, bütün Moldovadan çoçuklar. Çok bu işä sevineriz , neçin deyni sayerız, açan biz toplanêrız, kim oynȇȇr Moldvan oyunnarını, kim Bulgar ,kim Gagauz, onnar hepsi barabar yapêr islä bir iş», — paylaştı Çadır – Lunga kasabasının primarı Anatoliy Topal.
Sţenaya çiktılar kollektivlar Moldovanın hem Gagaziyanın türlü taraflarından. Hepsinä, kim pay aldı vestivaldä, verildi gramotalar hem diplomnar.
Источник grt.md
