Çadır – Lunga «Kadinca» ansamblisi 65-cı yıldönümü kutladı
Çadır-Lunga oyun hem türkü ansamblisi «Kadınca» kutladı kendi 65-cı yıldönümünü yortulu konţertnan. Ansamblinin çalışannarını kutlamaa yıldönümünnän geldilär Gagauziyanın hem erli kuvetlerin öndercileri, hem da Çadır kasabasının yaşayannarı. Kultura evin zalı dop — doluydu.
«Kadınca» ansamblisini 1957 yılda kuruldu horeograf Dionis Tanasoglu. 65 yılın içindä «Kadınca» büük fayda getirdi gagauz kulturasına hem onun ilerlemesinä, bununnan bilä kazanıp milionnarlan siiredicilerin kalplarını.
Yortulu konţerttä ansambli repertuarından çaldı hem oynadı türlü oyun, ava hem türkü. Kollektivin eski hem şindiki muzıkacıları hem oyuncuları ödüllendilär Gagauziyanın kultura Bakannıından hem Çadır dolay administraţiyasındandiplomnarlan.
«Bu yıldönümünü biz adêêrız bizim orkestranın veterannarına, dans kollektivinä hem bizim kasabamızın yaşayannarına. Bizim insannar bizi beenerlär, gelerlär bizim konţertlara», — söledi «Kadınca» ansamblisinin başı İvan Dermenji.
Geldilär kutlamaa «Kadınca» ansamblisini diil sade avtonomiyanın kuvetleri hem kasabanın yaşayannarı, ama Gagauz kulturasını sevennär Gagauziyanın her bir tarafından.
«Çok saa olsunnar, ani bu kollektivı korudular, ani büünkü gün bizdä Gagauziyada bölä kollektiv var, bu çok önemli. Gelän yıllara onnarın işleri islää gitsin, taa çok insan onnarı tanısın, bilsin hem bizim gagauz kulturamızlan tanışsın», — söledi Valkaneş kasabasının muzeyin başı Vasiliy Malçev.
Yortu olayında pay aldı Gagauziyanın Başkanı İrina Vlah, Çadır dolay administratiyasının başı Natalya Şoşeva, hem başka erli hem avtonomiya uurundan kuvetleri temsil edennär. Hepsi onnar nışannadılar, ani herbir insan, kim oynadı yada bu vakıt oynêêr «Kadınca» ansamblisindä, braktı hem brakêr büük iz gagauz kulturasının korumasında hem ilerlemesındä.
«Hepsi bu insannar beenerlär kendi işini. Onnar hepsi koydular bütün üüreeni, kuvedini, talantını, ki «Kadınca» ansamblisi ilerlesin. Sevinerim, ani bu sţenada durêr insannar, kim gelmedi burayı kazanmaa, ama geldi korumaa hem ilerletmää bizim kulturamızı», — snışannadı Gagauziya Başkanı İrina Vlah.
«Bakmayarak zorluklara, bakmayarak bişeyä, bu ansambli çalıştı, hem çalıştı diil sade burada Çadırda, diil sade Gagauziyada ama onnar bütün dünneyä gösterdilär ne o gagauz kulturası, bütün dünneyi tanıştırdılar gagauz türkülerinnän. Var nicä burada taa bir keret sölemää sade saa olsunnar, ani çalıştılar, ani işledilär», — söledi Gagauziya kultura bakanı Marina Semönova.
«Bän isteerim sölemää, ani biz bizim «Kadincaylan» türkü çalarak, oynayarak gidecez ileri. İsteerim sölemää, ani onnar pek talantlı insannar, onnar göstererlär bizim gagauz kulturasını, bizim türküleri, bizim oynuları, ne kaldı bizä dedelerdän», — söledi Çadır – Lunga dolay administratiyasının başı Natalya Şoşeva.
Çadır-Lunga oyun hem türkü ansamblisi «Kadınca» geçti uzun hem diil kolay yolu. 65 yılın süresindä ansamblinin ecelindä oldu gözäl da, zor vakıtlar da. Ama bakmadan buna, «Kadınca» ansamblisini hep sayaceklar hem seveceklär hepsi, kim sever Gagauz kulturasını.
Avtor: O. Duloglo, çekim hem video kurgu: L. Arfonos
Источник grt.md 20.12.2022