Büük yangın Çok-Maydan küüyüdä razgeldi
Dün Çok-Maydan küüyüdä oldu büük yangın. Çeketti yanmaa kuru saman kırda, ondan sora nicä başardılar biçmää boodayı, da sürmedilär topraa. Sıcak havanın beterinä ateş tez kapladı büük erleri da geçti genç daaya.
İlk bilgilerä görä, ateş çeketti kırda neredä bereketi toplamaktan sora toprak sürülmedi, da tutuştu kuru saman.Yangın hızlı geçti daaya. Yangı süündürmää deyni geldi üç kurtarıcı brigadası Komrattan, Çimişlidän hem Besarabkadan. Hep ölä süündürmää ateşi yardım ettilär Komrat daa çorbacılıın uzmannarı hem yaşayannar.
Durgutmaa deyni ateşin yayılmasını trakturlar sürdülär kırların dolaylarını hem isladılar. Yakın 40 ektar kır neredä bereket toplanıldı, hem genç daa yandılar. Ateşi süündürärdilär beş saatan zeedä.
STANİSLAV SLESARÇUK, Hatalı olaylar bakannıın baş ofiţerı: “Yangına geldi üç araba, bu Besarabkanın brigadası, Komrattan hem Çimişlidän. Süündürdük ateşi saat sekizdä avşmamnen. Yangından zararlandı 20 ektar daa. Zararın sayısını belli ederlär. Yardıma geldilär daaçorbacılıın uzmannarıda”.
Ondan sora nicä belli edeceklär, kim kabaatlı yangında, erlem bu iş yaptı insan, koyulacek cezalar, nışannadı Gagauziyanın ekologiyayı korumak inspekţıyanın inspektoru.
TATYANA DRAGNEVA, Gagauziya ȇkologoyayi korumak inspekţiyasının uzmanı: “Kuru otların hem samanın yakılması — bu 115 -ci statyanın üçüncü punktu, neredä sölener ani açık erdä kuru otların yakması cezalandırılȇr insannarı 10 bin leydän yukarı cezaylan, kurumnar için da ceza 30 bin leydän yukarı kurȇr. Erlem belli edärsaydık anı yandı kır, bir ektar için ceza 250 ley, bakarak kaç ektar yandı. Dadada bakılacek fidannarın sayısı hem nekadar yandı”.
Nışannayacez, ani bereketi toplamak vakıdı başlamadan hem bittiynän hepsi çiftçi çorbacılıkların başları haberli, nicä bakmaa yangına karşı kuralları. Regional hatalı olayları bakanıın haberlerinä görä iki aftanın içindä kurtarıcılar çıktılar 6 keret süündürmää yangını kırlarda.
Источник grt.md 26.07.2022