Burası, sizä, orası diil!

Burası, sizä, orası diil!

Gagauziya Başkanı baskısına görä, onu GHTda cep deputatlar, kendi çounnuunnan hem Rusiya kokusunnan, Kirez ayın (iyün) 12-dä karar aldılar, ani Gagauziya Halk Topluşun eni seçimneri Ceviz ayın (sentäbri) 19-da yapmaa. Ama büünkü durumda Gagauziya Başkanın ayakları altında toprak kaymaa başlayınca, o Gagauziya Halk Topluşun bu gün seçimneri şüpä altına koydu.

Annayarak, ani Ceviz ayın (sentäbri) 19-da GHTya kendi çep kandidatlarını pek geçirämeyecek, Gagauziya Başkanı İrina VLAH, bu seçimnär genä olmasını deyni, amansız uran silähı kullanmaa başlêêr – COVİD durumunu. Hiç olmayan erdä, açan Gagauziyada bir-iki insan Covida ulaşêr, orayı hemen “kırmızı kod” dedikleri durumunu koyêr. Başkan bunu neçin sa yapmazdı, açan Gagauziya bıldır koronovirustan yanardı.

Gagauziya Halk Topluşun eni seçimnerinä karşı İrina VLAH Covid silähını bir kerä artık kullandı, açan Çiçek ayında, maamilä surat koronovirus beterinä görä, Gagauziyanın Üstolan Durumnarı Komisiyasına Hederlez (may) ayın 16-da Gagauziya Halk Topluşuna seçimneri durgutturdu. Gözüker, ani bu sțenariy tekrarlanacek.

Moldovaya bakarsak, Moldova Prezidentı Maya SANDU, Covid durumuna bakmadaan, hepsini yaptı, ani Moldova Parlamentına seçimnär olsun.

Ama Komrat sizä Kişinev diil hem burası, sizä, orası diil! Gagauziya Başkanı İrina VLAH hepsini savaşacek yapmaa, ani Gagauziya Parlamentına seçimnär olmasın. Onuştan şaşmayın, açan tezdä işideceyniz, ani “koronovirus pandemiyası beterinä Gagauziya Halk Topluşun

eni seçimneri Ceviz ayın (sentäbri) 19-da olmayaceklar”. Belliki onnar olmarsalar, olmayaceklar gagauz halkın başına gelän bu başkannık belası beterinä.

Todur ZANET

Anaktar sözlär : Gagauziya Başkanı, Gagauziya Halk Topluşu, Halk Topluşuna seçimneri, Moldova Prezidentı

Источник anasozu.com

İlgili statyalar

Gagauziya Halk Topluşuna seçimnär geçer

2021 yılın Ceviz ayın (sentäbri) 19-da Gagauziya Halk Topluşuna (GHT) eni seçimnär geçer. Halk Topluşunda 35 mandata 124 kandidat var.   Bütün Gagauziyada seçmcilär listelerindä 114 210 kişi var. Kaçı onnarın seçim bölümnerinä geleciklär pek tezdä üürenecez. Gagauziya Merkez Seçim Komisiyasını (MSK) bildirdi, ani seçimnerdä 80 erindeki hem 50 yabancı gözlemci var. Источник anasozu.com

Şindilik 120, ama taa 10 gün var

Gagauziya Halk Topluşun eni seçimnerindä kandidat olmaa deyni, şindilik, Gagauziya Merkez Seçim Komisiyası (MSK) 120 kişiyä kandidatlaa registrațiya yaptı. Esap alarak, ani Gagauziyada 35 tek mandatlı seçim bölümü var hem oralardan lääzım olacek 35 deputat ayırılsın, büünkü gündä bir erä 3,43 kişi geler. MSKya kandidatlaa dokumentleri vermää deyni taa 10 gün var. Bakalım kaç kişi taa bu işä katılacek. Aklınıza getireriz, ani Gagauziya Halk Topluşuna eni seçimnär 2021-ci yılın Ceviz ayın (sentäbri) 19-da lääzım olsun. Onuştan GHT deputatı olmaa deyni imza listelerinnän danışmaları var nicä  yapmaa Harman ayın (avgust) 20-nin saat 17:00-nä kadar. Источник anasozu.com

Video: Gagauziya Halk Topluşuna seçimnär davaylan tanıldılar

“Düünkü oturuşta canavar ayın 12-ndä Apellaţiya davası tanıdı seçimnerin çıkışlarını hem GHT taa 17 deputatların mandatlarını. Butakım kanonnarı kabledän organına ayırıldı hepsi 35 deputat.  O vakıttan, nicä bu çıkışlar açıklandılar, hem Apellaţiya davası kabletti bölä kararı, Gagauziyanın Başkanı İrina Vlah 30 günün süresindä lääzım belli etsin Halk topluşun ilk oturuşun gününü”, — açıkladı Gagauziyanın Mrkez Seçim Komisiyasının başı Yana Kovalenko. Источник grt.md

Halk Topluşu en küçük çana yavaşıcık urdu. Gagauziya Başkanı bunu da yapmadı.

Harman ayın 13-dä Moldova Parlamentı tarafınfan ilk okumakta kabledilän “Moldova Respublikasının Prokuraturası için” zakonuna diiştirmeklerinä Gagauziya Halk Topluşu Başı yımışak bir mektıblan danıştı. Mektumbta Gagauziyayı temeldän sökmesinä sadece “yazık bir yannışlık” deniler. Burada sa büük Çannarı düümää lääzım. Источник anasozu.com


İnsannarın cuvapları: