Bulgariyada geçmiş turnirın gümüş ödülcüleri oldular “Çadır-Lunga” futbol klubu
Bulgariyada Nesebr kasabasında geçti Halklararası uşaklar arasında futbol turnirı “Vakanţıya” Nesebr kasabanın kuboona. Yarışmaklarda pay aldılar 40 komanda 7 yaş kategoriyada. Gagauziyayi tanıttılar futbolistlär Çadır kasabasından.
“Çadır-Lunga” futbol klubu pay aldı futbol turnirında 12 yaşınadan kategoriyasında. Turnir geçti “herbir herbirinnän” sistemasına görä. Komanda geçirdi 5 matç, dördünü taradı birinidä tarattı. Çıkışta kazandı ikinci eri.
Fk “Çadır — Lunga” futbol meydanda karşı karşıya geldilär kaavi konkurentlan Litvadan, Makedoniyadan, Serbiyadan, Bulgariyadan hem Ukrainadan. Nicä nışannadı komandanın baş trenerı Aleksandr Belov, en çok onu yarışmaklarda duygulandırdı Litvanın Vilnus komandanın disţıplinası. FK administratoru Nikolay Karaman urguladı, ani bizim uşaklar ii gösterdilär kendilerini hem kaavi oynadılar, da belli ettilär ani futbol Gagauziyada ilerler.
“Biz şüpelenärdik nicä geçecek turnir, nicä uşaklar kendilerini göstereceklär, oyunda taa kaavi konkurentlarlan, Evropada. İlk keret pay aldı Litva. İlk matçta Litvayi taradılar sayıylan 4-1. Sora hep ölä taradılar Makedoniyalıları, Serbiyadan futbolcuları. Turnırın hazırlayıcılarınnan bulgarlarlan bizä biraz uymadı. İsterim sölemää, ani biz inandık uşaklara, biz mutluyuz onnarlan. Onnar tamannadılar koyulmuş daavaları. Onnar verdilär bizä impuls ki ileri dooru onnarlan işlemää. Görünärdi sevinmelik onnarın gözlerindä, hem istemek taramaa”, — açıkladı Nikolay Karaman.
Çadırdan komanda urdu 17 gol, kolverip kendi tokatlarına sade dört. Bitki oyunda kaavi konkurenta tarattı erideki komandaya “Burgas nefto-himik” sayıylan 3 — 4. Urgulayacez, ani futbol klubu 6 yıl sıradan pay alȇr bu yarışmaklarda.
“Matçin süresindä kazandılar etişmeyän puannarı, da çıktılar ileri, ama onnara etişmedi becermek. Bizim uşaklar sınaştılar oynamaa yapılı futbol meydanında, burada sıra geldi oynamaa halız meydanda. Ama isterim nışannamaa, ani uaşklar yaptılar hepsini ne biz onnara söledik. Biz şüpelenärdik nicä geçecek meydannarın diişilmesi. Ama uşaklar gösterdilär, ani onnar hazır oynamaa türlü meydanda hem devlettä”, — nışannadı Nikolay Karaman.
“Çadır — Lunga” FK baş trenerı Aleksandr Belov şükür etti hepsi oyuncuları, angıları güreştilär bütün kuvetlän herbir matçta. Çoyuna deyni bu ilk haklararası turnir, onun için uşaklara hiç yok laf, nışannadı trener. Gelän aftadan komanda çekedecek hazırlanmaa iki halklararası turnira. Onnar geçeceklär Turkiyada Bursa kasabasında hem Almaniyada.
Источник grt.md 29.06.2022