Büdjettän yardımı kabledän studentlär üürenmeyi brakarsaydılar, lääzım olacek parayı geeri versinnär
Moldovanın kimi üüretmäk kurumnarı savaşȇrlar çevirmää parayı studentlerdän, angıları bücet parasınnan üürenärdilär, ama başarmadılar kendi üürenmesini. Onnarın sırasında KDU-dä. Saymak palatasının kontrol çıkışlarına görä sade bıldır devlet yakın 45 milion leyä kadar harcadı üürenicilerä hem studentlerä, angıları ya kendileri braktılar üürenmeyi, ya prost notalar için koollandılar oradan.
Finans ministerliin çıkışlarına görä 2021 yılda devlet 44,8 milion ley kaybetti bu takım studentlerın beterinä, angıları türlü sebeplerä görä üürenmeyi braktılar. Bir üüretmäk kurumu 39-dan harcanılmış paranın bir payını ola bildi çevirsin. Laf gider Energetika hem elektronika merkezi için. KDU — dä dä butakım olaylar var. Nicä nışannadı Komrat universitetin rektoru Sergey Zahariya, onnar da bu sebeplän baalı daava kurumuna kimi danışmakları yazdılar.
Büünkü gün Moldovada üüsek üüretmäk kurumnarın finanslamak uurunda eni formulası deneler, angısını iki yıl geeri kablettilär. Ona görä er student, angısı bücetta üürener, istämeer ileri dooru ürenmää ya onu bu kurumdan prost notalar için koolȇrlar, lääzım olacek çevirsin harcanılmış devletlän parayi. KDU rektoru bölä kararı dooru sayȇr.
Ama var taa bir önemli kural, angısı studentin hem üüretmäk kurumun arasında lääzım bakılsın. Ki olsun hak istemää bu studenttän parayi geeri, er o istämeer başarmaktan sora işlemää, lääzım bu iş erlerini ona ilkin teklif etmää, paylaşȇr düşünmeklerinnän Sergey Zahariya. Bundan kaarä, sayȇr rektor, gelän studentlärlän lääzım zanaat ayırmasında da hazırlamak işini götürmää.
Eni formulanın kullanılması, angısına görä plannanȇr bücetä harcanılmış parayi studentlerdän geeri çevirmää var nasıl şindän sora bu güzdän başlanılsın.
Источник grt.md
