“Bu yılın koşulları bizi zorladılar”. Çadır dolayin çiftçilik kurumnarında durumu için bereketin toplaması başlamadan
Ekinnerin ilk grupanın berekedin toplanılmasınadan Gagauziya Çiftçilik bakannıın uzmannarı kırlarda durumu gözlederlär. Bu yapılȇr neetlän belli etmää, nesoy bereket bekleniler, bakmaa hazır mı tehnika hem nesoy başka problemalarlan çiftçilik kurumnarı karşı gelerlär. Çiftçilik kurumun hem Çadır dolayın administraţiyasının temsilcileri 17 çiftçilik kurumunu kontrol ettilär.
Tomay küüyün çiftçilik kurumnarın nirindä 170 gektar baa ekili. Onnardan 100 gektar- biyaz üzüm, 70- kırmızı. Bu yıl bu kurum, nicä dä başkaları, türlü problemalarlan karşı geler, paylaştı çiftçilik kurumun genel uzmanı Dmitriy Balaban.
«Büünkü gün petrol malların paayı üüsek, ama erleri işlemää lääzım. Malların paaları pek büük çıkȇr. Nesoy ileri dooru işlär gidecek görecez», — açıkaldı Dmitriy Balaban.
Başka kurum Tomay küüyündä 2 soy kirez büüder 8 gektarda. Nicä nışannȇȇr önderci Valeriy Yalama, beklenilärdi bu yıl ii bereket, ama suuk gecelerin beterinä o oldu taa iisik. O paylaşȇr, ani geçän yıllar Rusiya devletinä berekedi satardı. Şindi sä kirezi var nasıl sade devletin panayırlarında satmaa.
«Problema onda, ani kuvannar konamadılar çiçeklerä, onuştan bereket tä az. Tehnologiyaya görä hepsi işleri geçireriz. Solärkaya da paalar iki okadar kalktılar», — nışannadı Valeriy Yalama.
Baurçu küüyündä çiftçilik kurumnarın biri 1802 gektar er işlettirer. Orada güzlükleri, arpa , papşoy, semiçka, sorgo hem lön büüderlär, annattı kurumun agronomu Arseniy Karapirä.
«Bıldır 103 ektar ektik, bereket yakın 2 tonn kablettik. Bu yıl bilmeerim nesoy olacek. Er yamurlar yayarsaydılar, bereket ta olacek. Kimi ekinneri ekmäk için kendilerimizä brakȇrız, kalanını satȇrız», — annattı Arseniy Karapirä.
Kazayak çiftçilik kurumu 2364 ektar er işler, neredä güzlükleri, arpa, goroh, papşoy hem semiçka büüder, paylaştı kurumun öndercisi Maksim Kol.
«Hepsi lääzımnı tehnologiyalar kullanıldı ki ii berekedi kabledelim, ama bu yılın hava durumu bizi durgudȇr. Bekleniler diil pek ii bereket», — söledi kurumun öndercisi.
Kıpçak küüyün «Pobeda» kolhozunda 4700 ektardan zeedä er ekildi . Ama nicä urguladı agronom Vitaliy Hadjibaş, kurumda nicä dä çoyunda var problemalar.
«Yamurlara umutlanardık, ama var ne var. 124 ektar kır Odesa selekţiyasının «9 val» boday çeşidinnän ekili. Beslemäk mallarını ne ekmektä, ne da sora kullanmadık. Verdik sade yapraklara yardım onnar büüyüyarkana», — açıkladı Vitaliy Hadjibaş.
Çadır dolayında ilk hem ikinci grupa boodaylar 40 –tan zeedä ektarda ekili. Kurumnar şindän sora toplamak vakıdına hazır, çıkış olarak açıkladı Gagauziyanın Çiftçilik bakanı Andrey Dimitroglo.
Büük problema Gagauziyanın çiftçilik kurumnarına deyni o, ani yok nereyi bodayı satmaa, urguladı Andrey Dimitroglo.
Источник grt.md 24.06.2022