Bu yıl “Gagauz şarap yortusunda” mallarını temsil edeceklär 16-dan zeedä şarap fabrikası
Gagauziyada adetçä kasım ayın ilk pazarı «Gagauz şarap yortusu» festivali geçecek. Gagauz şarabı, zengin halk adetleri, ustaların sergileri, gagauz imeklerin datması hem başka işlär bekleer musafirleri hem turistleri yortuda. Mariya Statova üürendi taa derindän hazırlanmaklar için.
«Gagauz şarap yortusu — 2022» festivalini plana koyuldu geçirmää kasım ayın 6 -da Komradın meydanında. Onda pay alacȇklar şarap yapan kurumnar, çiftçi çorbacılar, ustalar hem primariyalar.
Geçirmää deyni festivali lääzım olacȇk hazırlamak komitetini kurmaa, haberledi Gagauziya çiftçi bakannıın başı Andrey Dimitroglo Bakannıık komitetin oturuşunda.
Onun laflarına göörä, ilk etapta bir türlü işlär geçireleceklär. Belli edili hem kararılı pay alannar. Onnar kendilerini temsil edeceklär festivaldä kasım ayın 6-da.
«Şindiki zaman belli ,ani 16 şarap yapan kurumnarı pay alacȇklar: 10 Gagauziyadan, 6-sı bütünnä Moldovadan. Bu bizä deyni ii sayı. Bu yıl en çok pay alan», — haberledi Andrey Dimitroglo.
Üç kurumun pay alamsı festivaldä taa diil belli. Hep ölä hazırlanȇr listä şarap yapan kurumnarınnan hem çiftçi çorbacılarınnan,angıları ödülleri kabledeceklär.
«Biz bileriz,ani oluşun baş daavası – yardım etmää bizim çiftçi kurumnarına, şarapçilara. Bölä genişlederiz ortakları, üüselderiz şarabın satmasını. Eni iş annaşmaları imzalȇȇrız», — nışannadı Bakannık komitetin başın yardımcısı Olesä Tanasoglo.
Bu yıl, nicä dä herzaman, avtonomiyanın herbir primariyası kendi aulcuklarını sokakta koyacȇk.
«Biz artık yaradıcılık koliktivlerinnän çalıştık. İsteerim sölemää, ani şindiki zaman bizdä 16 küü hem kasaba kayıl kendi aulcuklarını getirmää. Belli ettik onnarın büüklüünü. Nişannayacam, ani yıl — yıldan olayın sınırları genişlener», — söledi Kultura bakanı Мarina Semönova.
Olayda 500 artist sţenaya çıkacȇk. Kurucuların laflarına görä musaafirlär hem turistlär yakışacȇk datsınnar gagauz milli imeklerini hem şaraplarını. Bundan kaarä kim isteyecek, yakışacȇk şarap kendisinä satın alsın yada ellän yapılmış işleri. Festival başlayacek saat 10-da saabalen.
Reportör: Мariya Statova, ses: Marina Topal
Video: Vlad Tabaçuk
Montaj: Мariya Kazaku
Источник grt.md 21.10.2022