Bu kerä, Türkiye gibi, “Eurovision” konkursunu dädusunun yanına yollayan olacek mı?
Pazar günü, Hederlez ayın (may) 14-dä, “Eurovision – 2022” konkursun iplerini ellerindä tuttannar açıkladılar konkursun tarayanını – Ukraynadan “Kalush Orchestra” grupası: türküylän “Stefania”.
Ani “Eurovision – 2022” enseyecek Ukraynadan artistlär hiç birisinin şüpesi yoktu, çünkü incäzanaattan çoktan politka zanaatına dönän “Eurovision” yarışması bunu ölä ya da bölä yapaceydı, zerä onnar lääzımdı göstersinnär, ani Rusiyaya karşı cenk edän Ukraynadan arka olêrlar. Sansın başkası arka olmazmış gibi?!
Laf diil ondan, ani ensedi Ukrayna, ama laf ondan nicä “Eurovision – 2022” konkursun iplerini ellerindä tuttannar arışlara paklandılar, gülmää alıp, deyecez Romaniya gibi jüri azalarını, kapayıp onnarın aazlarını hem cambazlıklan çalıp onnarın ballarını ölä, nicä Moldovadan Romıniyanın verdii 12 ballını çaldılar, da, yalancılıklan hem ikiüzlülüklän, ekledilär onnarı Ukraynaya.
Bölä mındar “politikasızlıktan”, “demokratiyalıktan”, “dooruluktan”, “açıklıktan” kusacaan kalkêr. Ama çoyu, hiç iirinmedään, bu mındarlıkları bal erinä yuttu hem taa da yudaceklar. Zerä “evropalı” fistan giyän adamnarın arasında, Türkiye gibi erkeklik yok nicä olsun.
Ya getirin aklınıza nicä 10 yıl geeri “Eurovision – 2012” savaştı gülmää almaa Türkiyeyi. Ne yaptı Türkiye? Dooru, erkekliini gösterdi da 14.12.2012 günü, yollayıp “Eurovision” konkursunu dädusunun yanına, kurdu “Türkvizyon” yarışmasını.
İtaliyanın Turin kasbasında olan “Eurovision – 2022” konkursunda Ukraynanın ardına erlär bölä payedildi: Sam Ryder (Büük Britaniya) – 2-ci er, Chanel (İspaniya) – 3-cü er, Cornelia Jakobs (Şvețiya) – 4-cü er, Konstrakta (Serbiya) – 5-ci er, Mahmood & Blanco (İtaliya) – 6-cı er, Zdob şi Zdub & Advahov Brothers (Moldova) – 7-ci er h.t.b.
Источник anasozu.com
