Bosniya-Gerțogovina devletinä TİKAdan taa iki proekt
Hepsimiz bileriz, ani Türk İşbirlii hem Koordinaţiya Agenstvosu (TİKA) bütün dünnäädä binnärlän yardım proektları yapêr. Geçennerdä proektların ikisi başarıldı Balkannarın Bosniya-Gerțogovina devletindä, angılarının ofițial açılışında pay TİKA Başkan yardımcısı Dr. Mahmut ÇEVİK.
Proektların birincisi – Bosniya-Gerțogovina devletinin başkasabasında bulunan Saraybosna Universitetin çiftçilik çorbacılıı fakultetında Amfiteatrunun enilenmesi. İkincisi da – Zenica kasabasının kapalı tip olan kapanında dikiş atelyesinin kurulması.
Amfiteatrunun açılış sırasında pay alan TİKA Başkan yardımcısı Dr. Mahmut ÇEVİK urguladı: “1995 yılından başlayıp TİKA Bosniya-Gerțogovinada bindän zeedä proektını ömürä geçirdi. Onnarın arasında çiftçilik alanında üzlärcä yapılan proekt var. Bosniya-Gerțogovinada 1992-1995 yıllarında yaşanan cengin acılarını dindirmäk hem bölgedä yaşayan halkın ömür standardını üüseltmäk için hem da göçü durgutmak sebepinnän uygulanan proektlarlan binnärcä boşnak, topraklarını brakmayarak, küülerindä yaşamaya başladı”.
Bosniya-Gerțogovina devletinin Zenica kasabasının kapalı tip olan kapanında 100 kişi çalışabilecek dikiş atelyenin açılışında sa Dr. Mahmut ÇEVİK açıklamasında TİKAyı bölä annattı: “TİKAnın 60 memlekettä 62 ofisin çalışmalarınnan yılda 2000 hem son 19 yılda 30 bindän zeedä proekt aslıya çıkarıldı”.
Источник anasozu.com
