Birliktä ilerlemäk
Gagauziyada geçän İnvestiţiya Forumuna toplandılar 600 temsilci 19 devlettän. Temayı ilerleder bizim korr.
Birkaç yılın süresindä Gagauziyada geçän İnvestiţiya Forumu MD vizit kartı gibi oldu. Burada MD hem Gagauziyanın investiţiya kolaylıkları halklararası kompaniyalara temsil edilerlär.
NATALYA KOJOKAR Gagauziyanın investiţiya çekmesi hem eksport ilerlemesi agenstvosunun başı: — “Biznes pek bekläärdi bu forumu hem dayma sorardı nezaman biz onu geçirecez. Burada biznes adamnarı türlü buluşmakları yakışȇrlar geçirsinnär hem kendi bakışlarınnan paylaşsınnar. Biz teklif ettik başarılı iş adamnarını ki onnar kendi bakışlarınnan hem tekliflerinnän paylaşsınnar ”.
MD Rumıniya investorları asoţiaţiyasının başı Dan Nuţiu nışannadı, ani sıra geldi aşırıdan investorları geeri devletlerinä çekmää.
DAN NUŢİU MD Rumıniya investorları asoţiaţiyasının başı: — “2015-cidä Rumıniyada abledildi bir programa, angısına görä vatandaşlar geeri devletä dönerlär da bizneslerini bizdä kurȇrlar. Büünkü günädän 100-län kompaniya devletimizä geeri geldi. Bän teklif ettim, ani bu programa MD-dä da geliştirilsin, çünkü geldi vakıt investorlarımızı geeri evä çekelim”.
MD ekonomika ministrusu Sergiu Gaybu nışannadı, ani bölä forumnar diil sade Gagauziyada, ama Moldovanın başka dolaylarında da geçirilsinnär lääzım.
SERGİU GAYBU MD ekonomika ministrusu: — “Pek önemli, ani Komratta geçän forumda pay alȇrlar iş adamnarı bütün devlettän hem aşırıdan. Onnar başka dolaylara da geçirilsinnär lääzım. Hükümet kayıl destek olamaa erli kuvetlerä infrastrukturayı düzmektä, ki onnarın kolaylıkları olsun alış-verişçilii ilerletmää ”.
Ayırı dikkatlık lääzm gençlerä verilsin, ki onnarın olsun kolaylıkları kendi biznes plannarının devletimizdän çıkmadaan gerçeklemää.
SERGİU GAYBU MD ekonomika ministrusu: — “Dün seftä biz teklif ettik inovaţiya ideyalarını desteklemäk proektini. İsteeriz, ani bizim talantlı gençlerimiz devlettä kalsınnar hem kendi plannarının burada gerçeklesinnär”.
MD TİKA agenstvosunun koordinatoru Selda Özdenoglu nışannadı, ani yıl-yıldan forumda pay alannarın sayısı zeedelener.
İki günnük forumda pay aldılar 600 kişidän zeedä 19 devlettän. Hepsini onnarı birleştirer bir fikir- investiţiya kolaylıklarını zeedeletmää hem ekonomikayı ilerletmää.
Источник grt.md 10.10.2022