Bir yıl eni binada: nicä geçerlär derslär Çeşmäküüyünün muzika okulunda büün
Çeşmaküüyünün muzika okulu eni binaya geçti. Ona verildi gimnaziya yapısı. Binayı enilettilär, kurup üüretmäk proţesi için hepsi lääzımnı koşulları. Artık bir yılın süresindä okulda derslär geçirlener.
Küçük küü. Muzika okulun eni binası. Erlär taa gıcırdamȇȇrlar, taazä boyalar duvarlarda, biyaz kapular hem aydın klaslar. 30 yılın süresindä, nicä açıldı muzika okulu, o seftä ev kendisinä buldu.
«Geçti yıl burayı erleştik. Şindi bizim klaslar büük, neredä hertürlü dersleri geçireriz. Klaslar aydın hem büük bir ilinnik o, ani binä yısıdılȇr. Burada gazlan yısınȇrız. Eskisindä iki soba yakardık, burada gaz var. Büük sevgiylän uşakları üürederiz hem bekleeriz hergün», — nışannadı Çeşmäküüyün muzika okulun başı Natalya Levandovskaya.
Büün okulda 44 uşak muzikaya üürenerlär. Genç muzikacılara yapıldı ii koşullar. 25 bin harcandı pençerelerin diiştirmesinä hem 18 bin ley eni kapulara gitti.
«Uşaklarda estetik duygusu terbiediler, odaları da gözellederiz. Çekederäk kapulardan, angılarını onnar açıp girerlär. Hepsi lääzım olsun erli — erindä, gözäl hem zamandaş», — söleer okulun başı..
Piano üüredicisi Valentina Pançeva 3 yıl sıravardır küüyün muzika okulunda üüreder. Ama o tutȇr aklısında, nicä zordu eski binada kendi işini götürmää.
«Bu okulda, belliki, taa kolay işlemää. Klaslar aydın. İş gider,okul da yaşȇȇr. Benim klasıma eni mobila alındı. Kuytulu ortalıkta raat işlemää. Bän dä bu muzika okulunu bitirdim, mutluyum, ani var kolaylık kendi üüredicilerimin işini ilerletmää», — paylaştı üüredici.
Çeşmäküüyünün muzika okulun başıNatalya Levandovskaya nışannadı, ani eni bina bütündän yapıldı uşaklara deyni. Dersleri geçirmää deyni var 6 klass. Herbirinä dä hepsi lääzımnı tedarlıklar alındı.
Источник grt.md
