Beşalma küüyünün kuvetleri: “Odun hepsi kabledecek”
Dual gaza paaların büümesinnän, yaşayannar geçerlär odunnan yısınmaya. Primariyaya yaşayannarın danışmakları onnara odunnan yardım etsinnär, gün-gündän zeedelenerlär. Komrat dolayın Beşalma küüyündä yakacakları insana vermesinnän problemayı çözmää düşüner erideki kuvetlär.
Beşalma küüyünün hepsi 830 ev çorbacılıı tezdä kabledeceklär yakacak kış için. Bir buçuk skladometra odun 900 ley tutacek. Yakacakları yaşayannara evä getireceklär.
«Kablettik kararı hepsi insana, kim yazacek danışmayı, yakacak getirecez. Birär priţep evä. Büünkü günä 300 danışmaktan zeedä var», — haberledi küüyün primarı Valeriy Moş.
Odunnarı insana evä erli liderların birisinin başçesindän getirerlär. Bu işi erli kuvetlär birleşip tä yapȇrlar, söledi deputat Grigoriy Dülger.
«Bu büünkü günün probleması diil. Taa ilkyazın, açan dual gaza paaları çekettilär kaldırmaa, insan başladıydı danışmaa», — söledi deputat.
Odun kabletmää deyni, beşalmalılar lääzım kendi primariyasına isteklän danışsınnar.
«Nicä üürendik, ani yakacak vereceklär, yazdım isek da te getirdilär».
«Odunnan bu kış yısınacez. Kışa hazırlanȇrız».
Erli kuvetlerin haberlerinä görä, Beşalmanın 80% zeedesi kışın sobalarlan yısınȇrlar. Yakacaklar, angıları suuk zamanda 1 – 1,5 aya eteceklär, var nicä hepsi yaşayannar kabletsinnär.
Reportör: Svetlana Dimitroglo
Video: Grigoriy Stavilov
Kurgu: Mariya Kazaku
Источник grt.md 20.10.2022