Beş genç karı kableti grant kendi işini açmaa deyni zorlatmaklan güreşmäk proektinä görä
Komratta başarıldı proekt “Moldovada hem Gagauziyada karıları zorlatmaklan güreşmäk”. Onda pay aldılar genç karılar, geçip kendi biznesi açmaa deyni maasuz kursları. Programa kurulu ölä, ki vermää kolaylık karılara kendi kuvedinnän para kazanabilsinnär.
Gagauziyada zorlatmaklan güreşmäk proektinä görä bu yılın başından Kasım ayınadan genç karılar kendi biznesi kurmaa deyni kursları geçtilär. Proektin sonunda beş karı kablettilär grant ki kendi biznes — ideyasını gerçekleştirmää.
«Bän evdä tortları yapȇrım, ama hep düş güdärdim açmaa gendi biznesimi», — paylaştı grantı kazanan karıların biri.
«Biznes – ideyama görä bän erli maldan – koyun yapaayından yaperım papuç, şapka, eldiven hem başka giyimneri”, — açıkladı proektin taa bir payalanı.
Proekt PROON programasınnan barabar avtonomiyada işleyän aylelerdä zorlamak kurbannarına yardım edän merkezinnän yapılȇr. Merkezin başı Svetlana Georgieva belli etti, ani aylelerdä zorlamakların sayısı büüyer.
«Bu gösterilär baalı iki aspektlan: biri covid pandemiyasının beterinä hem onnan baalı izoläţiyaylan. Zorlayan kişi tek başına kalȇr kurbanınnan. İkincisi dä baalı hatalı olaylar durumunnan hem cenklän: bu faktorlar belli oldular karıların zorlaması olayların zeedelenmesinnän», — açıkladı Svetlana Georgieva.
Gagauziyada hep ölä var komanda, angısı aylelerdä zorlanan karılarlan çalışȇr.
«Biz olȇrız taa yakın herbir karıya herbir yaşamak punktunda. Soţial asistentin yardımınnan biz yufka durumda bulunan karılara vereriz konsultaţiya. Çünkü karı onu zorlayan insandan var nicä gitsin (ama var nicä dönsün dä ona – bu onun hakı), da ozaman biz bola karılar için yapȇrız hepsini, ki o normal yaşamaya dönsün. Bu sırada hem ona iş bulmak, hem ev, bakȇrız ne türlü ona yardım etmää para kazandırmaa sevilän zanaatından (hobi) hem başka. Butakım savaşȇrız karılara hertürlü yardım vermää, ki o kendinä genä inansın”, açıkladı Svetlana Georgieva.
Herbir karı var nicä merkezä psihologiya, soţial hem üridik yardımı için danışsın.
Источник grt.md
