Başkan dolaştı Komratta çilek emişini büüdän çorbacılıı
Gagauziyanin Başkanı İrina Vlah bulundu Komrat kasabanın kurumunda, angısı büüder çilek emişini. Kuruldu kurum 2020 yılda, koyup tepliţa kompleksını 1 ektara hem taa bir ektar ekip dışarda, onnar geçirdilär su damnamak sistemasını. Var nicä mi bizdä büütmää çilek emişini, hem var mı bu uura yardım devlettän, üürendi Zinayida Kanţır.
2019 yılda agrariyalar Maksim Diyanov hem Väçeslav Uzun kararladılar koymaa tepliţaları da büütmää emişleri. Düşüüünüp ayırdılar çılek emişini, çünkü regionda onu yok kim büütsün. Da ikinci yıl onnar kaplȇȇrlar erli panayırda üüsek eri.
Bu yıl bakarak geçän yıla bereket taa ii, söleer Väçeslav Uzun. Çilää büütmää kapalı gruntta taa ii nekadar, açık erdä. Butakım, bereketin kayıbı taa küçük nekadar dışarda. İlk bereketi çekettilär satmaa çiçek ayın bitkisindä Gagauziyanın hem devletin panayırlarında. Bütün toplanılmış bereketi koyȇrlar maasuz konteynerlara ki insannara olsun kolay almaa.
“Açık erdä taa çok risk, tolu, yaamur, taa geç çıkersın panayıra, paa da düşer aşaa, oler pek küçük, onu lääzım toplamaa, yada sıbıtmaa, yada satmaa. Onun için tepliţa taa ii, ama taa paalı. Biz bişeylän serpmeriz onnarı. Erideki panayırda pak ekologiya tarafindan emiş. İnsannar bilerlär neredä o büüdüler, da var nicä alsınnar, biz yok nicä yapalım prost mal”, — nışannadı Väçeslav Uzun.
Açmaa deyni kendi işini agrariyalar harcadılar diil sade kendi paralarını, ama aldılar kredit ta. Nicä nışannadı Çiftçilik bakannıın başı Andrey Dimitroglo, büün devlet hem Gagauziya verer subsidiyaları ilerletmää deyni bu uuru devlettä. Onun için regionda yıl-yıldan zeedelenerlär onnarın sayısı. Büük örnek buna agrariyalar, angıları büüderlär çilää.
“Bir-iki yıl geeri bizdä yoktu tepliţa hiç. Açan çeketti bu kanonnar işlemää subsidiyalar için, respublikada hem Gagauziyada var subsidiyalar fondu, başladılar açmaa tepliţaları. Komratta var birkaç tepliţa, Kotovskiy küüyündä dä. Biznes – plan yapılȇr bölä tepliţalara, finans yardımı da veriler devlettän. Var nicä çekettirmää bu işi. Çocuklar denerlär bu işi. Bıldır yoktu büük becermäk. Bu yıl taa ii. Bu yıl bu yannışlıklar yok”, — söledı Çiftçilik bakannıın başı.
İkinci yıl sıra vardı Gagauziya başkanı İrina Vlah geler bu çorbacılaa, ki üüenmää nesoy gider işlär çocuklarda hem nesoy problemalarlan karşı gelerlär. O hep ölä urguladı, ani bu kurumun açılması verdi kolaylık iş vermää başka insannara da. İki yıl geeri kurum kabletti regionun bücetindän subsidiyaları yakın 500 bin ley düzmää deyni tepliţaları.
“Sevinerim, ani bu yıl geldim burayı. Bu zor vakıtlarda işleerlär, bu çok zor, ama çocuklar akıllan bu işi yapȇrlar. Eni tehnologiyaları kullanȇrlar da sade onnar çilek Gagauziyada büüderlär. Biz dä isteriz onnara destek vermää. Ko Moldovada bilsinnär, ani bizdä bu işlän zanaatlanȇrlar. Onnarın işi taa ii olsun, ileri gitsin”, — söledi İrina Vlah.
Genç çiftçilär kendi kurumunda kullanȇrlar eni tehnologiyaları toplamaa deyni yaamur suyunu, ki Bucakta suyun etişmemezlii pek belli.
“Bizdä su damnamak sisteması koyulu, soluu kolvereriz ki pek sıcak olmasın. Geçan yıl bu yoktu, da şindi yaptık, koşullar taa ii. Geçan yıl sıcaktı büümnerä, bu yıl taa ilin”, — söleer Väçeslav Uzun.
İşçilär erkendän avşamadan toplȇȇrlar bereketi, urgulayıp, ani iş diil pek kolay, ama bereket sevindirer, emiş da tatlı, diil nicä aşırıdan getirilmä.
“Şindän sora bir yıl çalışȇrız. Burada beeneriz çalışmaa. Bereket da ii”.
“Biraz belim acȇr. Ama islä işlemää”.
“Sabaalen zor, ama taa sora hava taa uygun olȇr”.
Korumaa deyni bereketi ki ileri dooru onu satmaa alındı buz dolabı 500 kilaya.
Источник grt.md
