Başkan buluştu küçük hem orta uurlu biznesin iş adamnarınnan. Angı soruşlar bakıldı?
Dolayın kuvetleri savaşȇrlar yardım etmää erli biznes kurumnarına. Avtonomiyanın başı İrina Vlah geçirdi buluşmayi biznes adamnarınnan. Buluşmakta devletin biznesın ilerletmäk kurumun başın bir vakıt götüreni Dumitru Pıntä.
Gagauziyada 2 bindän zeedä biznes kurumu işler, bu gösterer biznes kulturanın ilerlemesi için, nışannadı Gagauziyanın başkanı İrina Vlah. Onun laflarına görä, bu sayi gösterer ani 2000 aylä gitmedilär devlettän ama savaşȇrlar ii yaşamayi erindä kurmaa. Bakmayarak ona, ani hem Moldova hem Gagauziya ekonimika hem energetika uurlarında türlü zoorluklarlan kaarşı geldi.
İRİNA VLAH, Gagauziya Başkanı: «İlk problemaları ekonomikada pandemiyada başladılar. Çoyu sizdän işi azalttılar ya parça vakıda kendi biznȇsını durgutsunar. Bozuldu importun hem ȇksportun logistikasıka yolları. Sizä lääzım oldu epidemiologiya koorumak kurallarını giriştirmää, angıları biznes proţesını hem zoorladardı hem paalıladardı».
Gagauziyanın Ekonomika hem turizm bakanı Natalya Çuvalskaya nışannadı, ki avtonomiyanın kuvetleri savaşȇr yardım etmää erli biznesa. Bu sektor da devletin büdjedını zeedeleder hem verer kolaylık insan iş erlerini evdä bulsun.
NATALYA ÇUVALSKAYA, Gagauziya ekonomika hem turizm bakanı: «Devlet vergi kurumuna görä 2022 yılın büük ayın birinäkadar Gagauziyada 6826 ekonomika agenti sayıya koyuldu. 98% ekonomika agenti- büük hem orta biznesın temsilcileri. Taa çoyu alış-veriş hem çiftçilik bölümündän».
Devletin biznesın ilerletmäk kurumun başın bir vakıt götüreni Dumitru Pıntä nışannadı, ani kurumda kendi büdjedı hem koşulları var, ki finans tarafından hem grant programalarınnan biznesa yardım etmää.
DUMİTRU PINTÄ, Devlet biznesın ilerletmäk kurumun geçici başı: «2022 yılda bizim kurum 400 milionluk yrdım verdi küçük hem orta biznes kurumnarına. Biz ilinnettik dokumentlerin hazırlanılmasını hem programayi, 2 milion leyilik grantlarımız ta var. Var grantlar hepsi biznes adamnarına. Bu afta energetika hem ţifra bölümündä programayi haberledik. İsteriz yardım etmää insana».
Bu kurum türlü zamandaş programalarını giriştirer o isteyennerä kim kendi biznesını ister açmaa ya ilerletmää nışannadı kurumun uzmanı Marin Gençu, açıklayip nesoy programalarda şindiki zaman var kolaylık pay almaa.
Avtonomiyanın 2000-dän zeedä kurumun arasından çoyu hazırlȇr türlü malları ii paylan hem AT sektorunda yardımı vererlär.
Источник grt.md
