Başkan açıkladı avtonomiyada paalar krizisinnän baalı problemalarını
GRT CK «İntervyu nedeli» programasında Gagauziyanın başkanı İrina Vlah regionda var olan problemalar için annattı. Onnarın arasında: paalar dual gaza, kış zamanında soţial kurumnarın çalışması, bitki vakıtlarda mitinglar, neredä yaşayannar kendi maana bulmaklarını açıklȇȇrlar.
Dual gazın paayı büünkü günä-devletimizin herbir yaşayanın acısı hem bu soruşlan prezident hem Hükümet lääzım zanaatlansınnar, sayȇr Gagauziyanın başkanı. İrina Vlah çizgiledi, ani devletin öndercilii istämeer Rusiyaylan lafetmää Moldovaya taa ucuz gazı vermää deynu.
İRİNA VLAH, Gagauziyanın Başkanı: «Prezidentimiz başka devletlerä gider dual gazınnan baalı soruşları konuşȇr. Şaştırȇr, ani başkalarınnan istämeer lafetmää, ama komşularımızlan gidip buluşȇr. Ne durgudȇr hep bu soruşları Rusiyaylan açıklamaa da paayı gaza bizim insana deyni belli etmää?»
Dual gazına paaların büümesi problemaları soţial kurumnarına getirecek, söledi İrina Vlah. O bildirdi umudunu, ani Hükümet var olan soruşu çözecek da soţial obyektleri kendi işini ilerkisi gibi götüreceklär. Bakannık komitedi kendi tarafından avtonomiyanın yaşayannarına deyni kimi tutturmak proektlerini kararladı.
İRİNA VLAH, Gagauziyanın Başkanı: «Büdjet proektini hazırladık, angısını Halk Topluşuna (HT) yolladık, neredä yaşayannarımızı tutturacez. Umut ederim, ani HT onu tutturacek. Olacek başka programalar da, ama onnara para lääzım. Olarsa üstün paralar, belli ki bu uura onnarı doorudacez».
Gagauziyanın başkanı mitingları tutturdu, söleyip, ani bu dooru adım insanın tarafından.
İRİNA VLAH, Gagauziyanın Başkanı: «Bizä deyni önemli, ki yaşayannarımız mitinglarda acılarını, korkunçluunu açıklasınnar hem kuvetlärlän işidilmiş olsunnar».
Getirderiz aklılarınıza, ani bitki vakıt avtonomiyanın kasabalarında, küülerindä mitinglar geçirilerlär. İnsanı paalar dual gazına, petrool mallarına imek mallarına dalgalandırȇrlar. Avgustun 4-dä Moldovada 23 ley bir kubometr gaz için koyuldu. Şindiya kadar insan 18,62 ley bir kubometr gaz için ödärdi.
Источник grt.md 09.08.2022