Bakannık komiteti: «Kıpçaktan paţientların bakılması lääzım geri Çadıra dönsün”
Kıpçak küüyün paţientların çevirmesi için soruşu kaldırdı mediklärlän toplantıda orak ayın 19-da Gagauziyanın Başkanı İrina Vlah. Çıktı üzä, ani birkaç yıl sıravardı bu yaşamak punktun vatandaşları ilaçlandılar Çadırdakı dolay bolniţasında. Ama Moldovanın Saalıı korumak ministerliinin izininä görä ilaçlanmasını Kıpçaklılar lääzım kabledsinnär Tarakliya kasabanın bolniţasında.
Gagauziyanın Başkanı izin verdi medik bölümnerin öndercilerinä işlesinnär sayıcılarınnan, da harçları bu uur için belli etsinnär, ki aartırmaa paraları bücettan.
İRİNA VLAH, Gagauziyanın Başkanı: “Neçin sizin dikatınız çektik bücetınıza, çünkü 3 gün geeri razgeldik diil pek ii bir durumnan. Şindiki zamanda var çok soruşumuz sigortalarlan bölümnerinä hem Moldovanın Saalıı korumak ministerliinä. Umudum var, ani inistrunun cuvabını yakında kabledecez. Herlim olamarsadı, ozaman hükümetin oturuşunda Kıpçak soruşunu kaldıracam”.
2019-cu yıla kadar Kıpçak küüyün yaşayannarı danışardılar mediţina yardımı için Tarakliya bolniţasına. Ama ilaçlanmayı yaşayannar bu küüdän kabledärdilär Çadırda. Bu durumun beterinä Çadır dolay bolniţası borçlandı 10 milion leyä kadar. Hep 2019-cu yılda avtonomiyanın öndercileri belli ettilär bu yannışlıkları, da inkär etti 2008-ci yılın izinini. Ama bu yıl belli oldu, ani Taraklının dolay bolniţasında var izin, ki şindiki saalıı korumak ministrusu Alla Nemerenko zapetti inkärı, daa geeri çevirdi 2008-ci yıldan izini.
OLESÄ TANASOGLO, Gagauziyanın Bakannık komitetinin baş yardımcısı: “Büün kuruldu ölä bir durum, ani sıra gelecek bu küüyün yaşayannarıı vermemää ilaçlanmayı, çünkü onnarın finanslanması bizdä diil bakılı. 2008-ci yılın izini enidän kuvedä girdi bu yıl çiçek ayından, neredä alınmadı esaba zamandaş mediţina, da bu yaşamak punktları insannarı ilaçlanmayı keblederlär Taraklıda”.
Bu olaylar eni belli edildi avtonomiyada, çünkü şindiyä kadar taa yok oldu ani avtonomiyanın ödenilmiş mediţina erlerini, alsınnar da versinnär Moldovanın başka erlerinä.
İRİNA VLAH, Gagauziyanın Başkanı: “Beni şaştırdı bu olay hem ani haberi taa cumaa günü kablettik, bakarak ani izin imzalandı taa çiçek ayında bu yıl. Kollegalar ansızdan esaba aldılar bu durumu. Bizdän yapılacek hepsi, ki hükümettän sorulsun butakım yannışlıklar. Diil belli neçin bölä davrandılar bizä. Ne Gagauziyanın öndercilerinin, ne da millet uurunda gözledennerin saalıı korumak uurunu bölümnerin haberleri var. 2-3 ay sora üürendik”.
Lääzım mutlaka yapmaa hepsini, ki çevirmää Gagauziyanın paţientlarını geeri. Bu olayı belli etmektän sora Olesä Tanasoglo buluştu Gagauziyanın saalıı korumak bakanınnan, Çadır Dolay bolniţanın öndercisinnän, GHT baş yardımcısınnan hem sigorta kompaniyasının başınnan, neredä teklif edildi geçirmää Çadır hemTarakiya dolay bolniţalarında audit.
OLESÄ TANASOGLO, Gagauziyanın Bakannık komitetinin başın yardımcısı: “Audit lääzım geçirilsin, ki belli olsun, nekadar yaşayan Tarakliayanın dolay bolniţasına danıştı ilaçlanmak için. Hem belli ki hepsi yaşayannar diil lääzım orada ilaçlansınnar, onnardan elbetki 100% orada ilaçlanmadılar. İki bolniţa da bakılsın mutlaka”.
Gagauziyanın Bakannık komitetinin başın yardımcısı Olesä Tanasoglo teklif etti Sigorta kompaniyanın öndercisini, ki audit geçirilsin erindä bolniţalarda, diil sade kiyatta.
Nışanayalım, ani Moldovanın hepsi devlet medik kurumnarı çalışêrlar sigortalamk kurumun paralarınnan.
Источник grt.md
