Bakalım, Gagauziyayı dooru yoluna onnar doorudabileceklär mi?
Küçük ayın (fevral) 4-dä, may üç ay buuşmaktan sora, Gagauziya Halk Topluşunda bulundu taa bir ayık oy da, son-sonunda, Gagauziyanın VII-ci dönem Halk Topluşu kendi Başını, Başın yardımcılarını, GHT komisiyaları predsedatellerini hem GHT Prezidiumun azalarını seçti.
Nicä artık bildirdik, Gagauziya Halk Topluşu Başı 18 oylan seçildi Dimitriy KONSTANTİNOV (Ferapontyevka № 21 seçim bölümü).
Gagauziya Halk Topluşu Başı yardımcıları 17-şär oylan seçildilär: Georgiy LEYÇU (Çadır № 6 s.b.), Nikolay ORMANCI (Kırlannar (Kotovskoe) № 32 s.b.) hem Aleksandr TARNAVSKİY (Komrat № 3 s.b.).
Bundan sora GHT komisiyaları predsedatellerinin kandidaturalarını teklif etti GHT Başı Dimitriy KONSTANTİNOV.
Komisiya predsedatelleri oldular:
Nikolay İVANÇUK (Çadır № 5 s.b.) – ekonomika hem finans komisiyası;
Mihail JELEZOGLU (Kiriyet №25 s.b.) – reglament komisiyası;
Dimitriy MANASTIRLI (Kıpçak № 31 s.b.) – bilim, üüredicilik, kultura, dil hem dinnär komisiyası;
Valeriy MANASTIRLI (Kıpçak № 30 s.b.) – çiftçilik işleri komisiyası;
Valentin GAYDARCI (Karbalı №23 s.b.) – saalıı korumak işleri komisiyası;
Nikolay RAYA (Düzginca № 18 s.b.) – industriya işleri komisiyası;
Ruslan UNİLOVSKİY (Svetloe № 34 s.b.) – dış ilişkileri hem erindeki çorbacılık işleri komisiyası.
İlya UZUN (Rus Köselisi № 33 s.b.) – gençlik hem sport işleri komisiyası;
Sergey ZAHARİYA (Kongazçık № 29 s.b.) – yuridika işleri komisiyası.
Sindi sırada Gagauziya Halk Topluşunda Gagauziya İspolkomun azalarının enidän temellenmesi. Bu azaların kandidaturalarını lääzım teklif etsin Gagauziya Başkanı.
Источник anasozu.com 07.02.2022