«Askerlik akademiyası girginnii terbi eder». Nicä Moldovanın tek askerlik üüsek okulun studentı olmaa
Moldovanın Aleksandr Çel Bun adına tek asker akademiyası işleer Kişinöv kasabasında. Onun baş davası hazırlamaa ofiţerları Moldovanın Milli armatasında çalışmak için. Her yıl üüretim kurumunu başarêrlar uzmannar pehotada, arteleriyada, baalantılar, sınır korumasında hem karabinerlar. Nesoy kullanmaa kolaylıı da girmää üürenmää akademiyaya, üürendi bizim çekim grupamız.
Üürenmää akademiyada var kolaylık nicä genç olannarda, ölä da kızlarda. Abiturientlar lääzım göstersinnär bakalavra êkzamennerinin sertifikatını.
İlk üürenmäk yıllar zor, önemli olsun dayanmak, kuvet hem becermeklär, nışannadı Akademiyanın rektoru Anatoliy Bukuç.
“Aleksandru çel Bun adına Akademiyası — tek üüretim kurumu asker uurunnan. Bizdä var çok türlü zanaatlar Molodovanın gençlerinä deyni. Burada hepsi üürener parasız. Hepsi yaşamak için odalar, imäk, hepsi harçları üstünä devlet alȇr”, — nışannadı rektor.
Asker akademiyasında üürenmäk 3 yıl sürter. Ofiţer olacek gençlär üürenerlär zanaatları asker uurunda bilgilär fakultetında hem devlet uurunda öndercilik fakultetında, haberledi polkovnik, tehnika bilgilerindä doktor, doţent, asker akademiyasında halaklarası baalantıların uzmanı İgor Sofronesku.
Üürenmäk vakıdında zorluklar sora iilää dönüşerlär: askerlik uuruna üürenmäk girginnik verer, katıldıkça bu büük ayleya, angısı elbetki koruyêr devletin vatandaşlarını. Üürenmäk süresindä kursant üüsek bilgileri, sigortalı iş erini, parasız yaşamak erini hem üüsek ay kazanç paralarını kableder.
“Havez üürenmää Asker akademiyasında uyandı bendä taa okulda, 9-cu klasta. Pek beendim buradakı disţiplinayı hem vakıt kullanmasını”, — paylaştı ilk kursun studenti Mariya-Aleksandrina Babiç Hınçeştı dolayından.
“Küçüktän taa vardı umudum girmää üürenmää bu Akademiyaya. Ne meraklandırdı, ani burada var ii zanaatlar, üüredicilär”, — annattı taa bir ilk kursun studenti Anna-Mariya Siminük.
“Bän istedim anam-bobam gibi olmaa. Onnar ikisi da asker uurunda uzman. Taa küçüklüümdän beendim bu uuru”, — söler student Kêtlin Andronik Belţı dolayından.
Kursantların hem üüredcilerin saalıını gözleder mediţina uurunda profesionallar.
“Bizim işimiz hep ölä nicä da aylä doktorlarında. Bizim bölümüzdä var staţionar. Burada 10 hastaya kadar var nasıl ilaçlayalım salgından, furunkullardan hem başka yaralardan”, — açıkladı Medik bölümün başı Ruslan Dabula.
Kursantlar için kurulu biblioteka da, neredä var hepsi lääzımnı literatura.
“Herkezi alêr okumak için kendi zanaatına görä literaturayı. Var kursantlar, angıları okuyȇrlar şindiki zamandaş literaturasını da”, — annadȇr bibliotekanın uzmanı Lüdmila Vasilaki.
Güüdä kaavileştirmesi için kursantlarlan işleer sport uurunda Êmil Guţu.
“2 sıra aftada kursantlar gelerlär sport zalasına, ki olmaa kuvetli. Bunnar hepsi bakılı normativlarda, ne armatada var”, — söledi o.
Girmää üürenmää asker akademiyasına deyni, lääzım dosyayı vermää erli asker bölümünä çiçek ayından — orak ayınadan her yıl.
Источник grt.md
