Asir boyu ömür. Kongazlı İlya Staev oldu 100 yaşında
Bu Günnär 100-cü yaşını nışannȇȇr Kongaz küüyünün yaşayanı İlya Staev. Bu gözäl günä karşı bizim televizion grupamız bulundu musaafirliktä bu ayledä.
Kongaz küüyünün yaşayanını İlyä Staevı 100-cü yıldönümünnän kutlamaa toplandılar onun senseleleri. İlyä Staev dünneyä getirmış hem büütmüş 7 kız hem 4 çocuk. Büün onun var 34 nepotusu hem onnarın da 57 uşaa var. Bu zenginnii ayaa kaldırsın deyni İlya Staev bütün yaşaması durmamayınca işlemiş.
“Bolniţaya yoktur danıştıım. Bütün yaşamam kırda işledim . Bekçi oldum, inekleri güttüm”, — annadȇr uzun ömürlü kahramanımız.
Büün İlyä Nikolaeviç yaşȇȇr yalnız, ama onun uşakları hem torunnarı onu bir minuda da yalnız brakmȇȇrlar. Birlik hem dostluk kaliteleri aylenin baş kuralları gibi herzaman terbiedilärdilär, nışannȇȇr İlya Staevın oolu Nikolay.
“Bobamız herzaman iştäydi, ama uşaklarlan zanaatlanardı. Yaşadık dostlukta. Bu kural büün dä aylemizdä yaşȇȇr”, — söleer Nikolay Staev.
Yaşamak zoorlukları sebebindän İlyä Staevın uşakları büün daaldılar bütün dünneyä. Ama onnar hep okadar savaşȇrlar toplanmaa aylenin en önemli yortularına.
“Biz büün toplanȇrız bobamızın duuma günündä, eni yıl hem paskellä yortularında. Bu bizä deyni bir kural”, — açıkladı İlyä Staevın kızı Praskovyä Duşkova.
Büük sıcaklıklan İlyä Nikolaeviçi onun torunnarı dolaşȇrlar. Kimisini o büün aklısında tutmȇȇr, ama seviner, açan gençlär kapusunu açȇrlar.
“Pek islää, ani o ayakta saalıkta. Biz pek sevineriz bu işä”, — söleer Olga Çebanova, İlyä Staevın torunu.
Kutladı İlyä Nikolaeviçi küüyün aksakallarısövetin öndercisi Ekaterina İkizli.
“Bütün küü büün seviner, ani bizdä var bölä bir adam. Dileeriz ona saalık hem herzaman yanında uşakları olsun”, — nışannadı Ekaterina İkizli.
İlyä Nikolaeviç Staev duudu kirez ayın 11-dä 1922-ci yılda Kongaz küüyündä. Onun soyunda büün var 90 kişidän zeedä.
Источник grt.md 10.06.2022