Ankarada Moldova Respublikasının kultura Günneri geçti
Moldova Respublikasının baamsızlıını açıklamasının (27.08.1991 y.) günün 30-cu yıldönümü kutlamaları çerçevesindä, Kasım ayın 23-28 günnerindä Ankarada geçti Moldova Respublikasının kultura Günneri, angısını, ortak olarak, hazırladılar Moldova Ankara Büükelçilii, KUKSADER (Kukla Karagöz gösteri hem Sțena Zanaatları Dernää, başkanı – Halük YÜCE) hem da Tempo Produkțion firması (Tiyatro Tempo).
Maasuz Kultura Günneri için Türkiye Respublikasının başkasabasına Ankaraya geldilär Moldovanın “Joc” milli tanțları ansamblisi, “Lăutarii” milli orkestrası, Gagauziyanın gagauz halk oynnarı “Kadınca” ansamblisi.
Kasım ayın 23-dä olan Ankarada Moldova Respublikasının kultura Günnerin açılışında pay aldılar hem nasaat ettilär Türkiye hem Moldova kultura ministirliklerin temsilcileri, Moldova Ankara Büükelçisi Dimitriy KROYTOR, Tempo Produkțion firmasının direktoru Marina YÜCE. Bundan kaarä açılışta pay aldılar yabancı devletlerin Ankara Büükelçiliklerin Büükelçileri hem başka diplomatları.
Açılışta, Ankaranın “Congresium” konțert zalında toplanan 2200 siiredicinin önündä kendi ustalıını gösterdi Moldovanın “Joc” milli tanțları ansamblisi.
Ertesi günü, Kasım ayın 24-dä, “Prezidentın Konțert zalında” 1350 siirediciya deyni çaldı Moldovanın “Lăutarii” milli orkestrası.
İki konțert ta Ankaranın “Armada” hem “Kentpark” alış-veriş merkezlerindä Kasım ayın 27-28 günnerindä gösterdi Gagauziyanın gagauz halk oynarı “Kadınca” ansamblisi.
Eridir urgulamaa, ani bu Kultura Günneri hepsi sıraların açılış nasaatlarını yaptılar Moldova Ankara Büükelçisi Dimitriy KROYTOR, Tempo Produkțion firmasının direktoru Marina YÜCE.
Ankarada Moldova Respublikasının kultura Günnerinä gelän insannar için kuruldu özel kolekțiyalardan moldovalıların hem gagauzların milli rubaları, kilimneri hem çanak-çölmek sergileri. Bundan kaarä, KUKSADER (Kukla Karagöz gösteri hem Sțena Zanaatları Dernää) hem da Tempo Produkțion firması (Tiyatro Tempo) çalışmalarınnan, moldovan hem gagauz imeklerinä degustațiyaları yapıldı.
Источник anasozu.com 14.12.2021