Andılar, ama Ukraynaya bişey demedilär
Canavar ayın (oktäbri) 13-dä Moldova parlamentında andılar Moldova vatandaşlarını, ani Rusiya-Ukrayna cengindä Ukrayna tarafından öldürüldülär. Onnarın arasında o cengä bir kabaatsız kurban olana kongazlı Vasiliy KULİŞ ta var.
2022-ci yılın Orak ayın (iyül) 26-da Rusiyanın Ukrayna sınırında Bränsk bölgesinin “Troebortnoe” tamöjnä punktunda bulunan Moldova vatandaşları Vasiliy KULİŞ hem İvan SURDUL üstünä ukraynalı dronu tarafından ataka yapıldı hem bir bomba atıldı. Bu bombanın patlamasından İvan SURDUL erindä öldürüldü, Vasiliy KULİŞ ta aar yaralandı. Bakmadaan ona, ani Vasiliy KULİŞi vraçlar kurtaramaa savaştılar, o, 2022-ci yılın Orak ayın (iyül) 30-da can verdi.
Ozaman Ukrayna açıkladı, ani bu atakada oldümüşlär Rusiyanın FSB zaametçilerini.
Bakmadaan ona, ani dronun operatoru görärdi bu insannarın țivil olduklarını, o, cellat gibi, onnarı kıydı (bak: https://www.youtube.com/shorts/W0kjtAtUy8M?feature=share). Ozaman ne Moldova Prezidentı, ne Premyer-ministrusu, ne da Prlament spikeri ses çıkarmadılar hem, bu tragediyaylan ilgili, Ukrayna tarafına bu öldürmäk için bişey demedilär.
Aradan iki buçuk ay geçtiktän sora, Canavar ayın (oktäbri) 13-dä diil Parlamentın soțialist olan Gagauziyadan deputatlar, ama soțialist Adrian ALBU teklif etti “anmaa hepsini, kim kayıp oldu bu konfliktta, hem, o sırada, iki vatandaşımızı da, ani öldürüldülär dron atakasında”.
Bu teklifi kabul ederäk, Moldova Parlamentın deputatları, aya kalkarak, bir minutluk saygı sussuzluunnan o cenktä raametli olannarı andılar.
Источник anasozu.com
