Afgan cengin askerini Georgiy Yanevı anmak dzüdo turniri Kazayak küüyündä geçti
GeorgiyYanevı anmak turnirlar geçiriler Kazayak küüyündä çok yıl. Hederlez ayın edisindä geçmiş dzüdo turnirindä pay aldılar uşaklar Moldovanın türlü dolaylarından.
Afgan cengindä canını kaybetmiş GeorgiyYanevın hatırına dzüdo turniri yapıldı Kazayak küüyünün kultura evindä. Yarışmaklarda pay aldılar 11 komanda birkaç aarlık kategoriyasında. Genç dzüdocülar gösterdilär kendini en ii taraftan.
«Duygularım pek islä, sevdim bu turniri. Biraz korkardım, ama bän dayandım».
«Bän isteerim üstelemää hepsini, ama altı kalasam da kahır olmayacam. Bölä turnirlarda taa pay almadım, ama iki keret Rumıniyaya gittim. Burada isteerim ilk eri almaa, başkalara da kısmet olsun».
«Bu benim ilk turnirım, onuştan biraz korkêrım. Isteerim ilk eri almaa, ama bakaçez nicä olacek».
Olayın musaafirleri nışannadılar, ani bola turnilar kaavilederlar, taa çetin hem üüsek uura kaldırêrlar dostluu uşakların arasında. Bakmadaan, ani onnar hepsi başka dillerdä lafederlär. Çünkü sport terbieder uşakları.
«İsteerim sölemää, ani bola turnirlar dostlaştırêrlar uşakları, angı halktan onnar olmasa. En önemli, ani onnar buluşêrlar bu matlarda. O toplȇȇr hepsini: rusları, ukrainalıları, moldovannarı, gagauzları, bulgarları. Hepsini, kim yaşêêrMoldovada», — nışannadı Moldova sambo federaţiyasının başı Yuliy Peatikovskiy.
“Çok saa olsun kafadarlarım, çoktan bileriz biri-birimizi, çok var trener Moldovada. Onnar geler bizä yardımlêêrlar, biz onnara yardım ederiz. Dostlaşêr uşaklar da, da bu büük iş. Uşaklara bütün yaşamasına kalêr, olêr kaavi fikirlär, kuvetlän kaavi, da olêr hepsicii gözäl”, — paylaştı bakışınnan Pötr Uzun, Kazayak küüyünün dzüdo trenerı.
Dzüdo turnirindän kaare, o günü geçti volleybol, şaşki hem domino oyunnarı. Kazayak küüyün primarın yardımcısı Ivan Momat nışannadı, ani herbir yıl onnar savaşêrlar geçirmää turniri üüsek uurda.
“Bizim vardı Afgan cengin veteranımız, angısı dönmedi geeri, onun adına biz yapêrız bu turniri. Bütün Respublikadan geler dzüdocülar, pay alêrlar. Bu yıl da geldi 11 komanda, sayêrım ani olaçek gözäl, büük uurda geçecek bu turnir”, — söledi küüyün primarın yardımcısı.
Genç dzüdocülar herbir aarlık kategoriyasında gösterdilär gözäl hem büük uurda güreşi. Bu yıl turnir GeorgiyYanev adına geçti 37-çi keret.
Источник grt.md
