30 09 21 YAŞAYANNARIN TEKLİFLERİNİ GERÇEKLEMÄK KOLAYLIKLARI
Bu yıl Gagauziyanın primariyaları başladılar katmaa yaşayannarı bücetin pay edilmesinä. Tomay küüyündä bu formatı kullanarak, bu yıl birkaç cümnä proekti gerçeklendi.
Partiţipatorlu bücetin yardımınnan küüylerin hem kasabaların yaşayannarı var nicä katılsınnar yaşamak punktunda var olan problemaların açıklamasına yada türlü önemli proektlerin gerçeklenmesini teklif etsinnär. Para bu uura primariyalardan veriler. Tomay küüyündä bu yıl herbir proektin gerçeklenmesi için 15-är bin ley verildi.
«Bu yıl biz seftä partisipatorlu bücetini kullandık. Bu verdi kolaylık yaşannara da katılmaa küüyün problemalarının açıklamasına», — söledi Tomay küüyünün primarı Födor Topçu.
Bu programanın yardımınnan küüydä 7 proekt gerçeklener.
«Komisiyä kararladı, ani teklif edilmiş proektlerin herbiri pek önemli bizä deyni. 2 proekt baalıydılar uşaklara hem büüklerä deyni dinnenmäk erlerin düzülmesinnän, bibliotekamız kazandı proekti uşaklara deyni literaturanın satın almasına. Yaklaşȇr sonuna Kirov hem Gorkiy sokakalrın proektleri. Onnarda insannar istedilär skemneleri koymaa hem bir dä halä yapmaa», — açıkladı primar.
Taa bir önemli iş, angısı yapıldı bu programanın yardımnnan, o er, neredä insannar ekmek kablederlär.
«İleerdän ekmek insannara verilärdi bir kırık yapıda, şindi sä insan pak hem gözäl bir erdä ekmek kableder», — annattı Födor Topçu.
Proektlerin gerçeklenmesindä pay aldılar yaşayannar da. Maalä — maalä komuşular toplanıp, neylän kuvetleri oldu, yardım ettilär.
Önemli urgulamaa, ani en ilkin bu uura primariyadan 50 bin ley verilärdi, ama komisiya, gördüynen teklif edilmiş proektleri, taa 50 bin primariyadan istedi. Bölä bu yıl partisipatorlu bücetin sayısı Tomayda 100 bin ley kurdu. Programa gelän yıla da ilerleyecek, onda katılmak için proektlärlän primariyaya her yıl kücük ayın 15-dän çiçek ayın 1-nä kadar danışmaa lääzım.
Источник grt.md 30.09.2021