29 09 21 FUTBOL TURNİRI MOLDOVANIN PRİMARİYALARIN KOMANDALARIN ARALARINDA
Komrat kasabasının merkez stadionunda geçti futbol yarışması Moldovaının üülen tarafının primariyaların arasında. Bölä buluşmalar geçerlär devlettä her yıl, da onnar ilerlederlär futbolu nicä sport çeşidi, hem vererlär kolaylık sportçular paylaşsınnar bilgilerinnän, becermeklerinnän, kursunnar sıkı baalantıları hem birleşik plannarı.
Turnirın davacısı, futbol veteranı Vasiliy Sukman nışannadı, ani yarışmaklar hazırlandıydılar üüsek uurda hem bu oluşların önemliini. Primarlar futbol oynamasınnan ii örnek gençlerä vererlär. O nasaat etti geçirmää taa sık sport oluşlarını, ki futbol sevennerin olsun kolaylıkarı pay almaa onnarda.
«Bizdä burada geçiriler turnir, angısını hazırladılar Moldovanın üülen tarafının primarları kendi aralarında. Te büün onnar bizim stadionumuzda oynayaceklar da belli edilecek taraycılar hem prizörlar. Bu büük bir ii işin başlaması – kendi primarlar çıkȇrlar meydana oynamaa futbol. Başkalarına, maalez gençlerä lääzım almaa örnek. Da taa sık geçirmää bölä oluşları, ki olsun ii becermeklär sportta hem yaşamada», — nışannadı Vasiliy Sukman.
Pay alan takımnarın kapitannarı nışannadılar, ani oyun meydanında kızgındı, da hepsi komandalar savaşardılar urmaa topu konkurentların tokatlarına. Ama finala çıktı en kaavi futbolcular. Turnirın musaafirleri umutlandırdılar, ani ileri dooruda pay alacêklar bölä oluşlarda hem tanıttıracêklar devletimizi halklararası turnirlarda.
«Biz pay alacêz türlü turnirlarda, halklararası arenada da. İi balantıları kurduk Ukrainanın komandasınnan, Rumıniyadan, yakın Poloniya hem Slovakiya klublarınnan. Hazırlanacêz ileri dooru. Da taa bir keret hepsini kutlȇrım, Komrat- kaavi komanda. Ama biz da aşaa kalmadık», — dedi musaafirlerin biri.
Kasabanın başı Sergey Anastasov nışannadı regionun yaşamak erlerin primarların aktiv pay almalarını hem muniţipiyanın nasaatçılarını, angıları oynadılar Komrat futbol klubu için. Bu oluşa görä futbola çekilecek taa çok genç olannar hem te onnar kim sever götürmää saalıklı yaşamayı sayêr kasabanın başı.
«Biz kendi meydanımızda aldık ilk eri, da ilerlederiz turnirları. O bizdä diil ilk Moldovada. Şükür ederim hazırlaycıları, Kauşan primarını, hepsini, kim büün oynadı. Hem Gagauziyanın da primarlarını Calaydan, Dezgincadan, nasaatçıları gözäl yortu için», — söledi Anastasov.
Turnirın çıkışlarına görä ilk eri kazandılar meydanın çorbacıları Komrat futbol klubu. İkinci erdä Kauşanı komandası, hem şannı pyedestalın üçüncü basamaana kalktılar Yalovenı klubun futbolcuları.
Источник grt.md 29.09.2021