09 09 21 MİHAİL ÇAKİR – GAGAUZ HALKIN APOSTOLU
Ceviz ayın 8 — dä 77 yıl geeri geçindi gagauz aydınadıcısı protoierey Mihail Çakir. Bu büük kayıplıktı diil sade moldovanın cümnesinä deyni, ama gagauz halkına da. Onun anmak günündä Moldovanın Devlet Universitetindä geçirildi bilim-praktik konferenţıyası «Tarih ecellerin birlii».
Mihail Çakirin anmak günündä Moldovanın Devlet Universitetin klisesindä geçti slujba onun adına. Gagauz aydınnadıcısı bu klisedä işledi 35 yıl. Din izmetçileri, angıları büün ilerlederlär onun işini, sölerlär, ani o braktı büük zenginnik nicä din tarafından, ölä da başka bölümnerdä.
«Biz bulunȇrız o vakıtta, açan biz savaşȇrız enidän kaldırmaa bizim kulturayi, istoriya zenginniklerini. Bizim büük zenginiimiz, bu bölä insan, nicä Mihail Çakir. Da büün bän sayȇrım, ani cümnä sade açȇr onun yaşamasının bir payını hem onun yaptıklarını Moldovanın hem Gagauziyanın kulturasına deyni», — söledi protoierey, teologiya uurunda doktor Vitaliy Zelenskiy.
Konferenţıyada kendi dokladrlarlınnan pay aldılar Moldovanın, Gagauziyanın, Ukrayınanın hem Bulgariyanın din izmetçileri, bilim adamnarı hem tarihçilär. Açtılar oluşu Moldovanın Devlet Univesitetin rektoru İgor Şarov hem Gagauziya Bilim Merkezin başı İrina Konstantinova. İgor Şarov nışannadı, ani Mihail Çakirin büük rolü var hem klisä, angısı büün işler — onun işi.
«Büün konferenţıyanın geçirmesi hem zalın açılışı onun adına bizä deyni büük oluş. Bän isterim ilk kutlamaa Oktavian Moşını, angısı bu klisedä götürer hem ilerleder M. Çakırın işini», — söledi Moldova Devlet Univesitetin rektoru İgor Şarov.
Oluşta istoriya, folklor, filologiya uurunda doktorlar, hem üüredicilär annattılar Mihayıl Çakir için, nicä birçok taraflı adam için hem belli yaşamanın faktlarına, ekledilär eni sayfaları, angıları taa ileri diildilär açık. Tarih uurunda doktor İvan Duminika kendi sözündä annattı protoiereyi nicä «rus halkın birliin» kurumun aktiv pay alanını.
«Biz — bilimcilär çekettik aaraştırmaa Mihail Çakırın yaşamasını, ama bir vakıt hepsi durgundu, da çiinenerlär bir erdä, açıklayıp onun yaşamasının salt bir taraflarını. Bu iş için büün söledilär kollegalar bu oluşta, onun için o önemli büün, zerä biz diil sade annattık Çakir için nicä din uurunda adam için, ama koyduk problemayı da. Onun için bilim-praktik konferemţıyası geçer», — nışannadı istoriya uurunda doktor İvan Duminika.
Stepan Bulgar açıkladı Mihayıl Çakırın eni yaşamak sayfasını, açan o çalışardı diil nicä din izmetçisi, ama aktiv pay alardı cümnenin yaşamasında, hem kendi ideyalarını açıklardı Besarabiya zemstvosunda nicä delegat gagauz tarafından.
Praktik konferenţıyasında seslenildi diil sade dokladlar protoiereyin yaratmak yolu için, ama kaldırıldılar geçmiş hem şindiki zamannarın problemaları üürenmäk, kultura, tarih hem folklor uurunda, hem hep ölä Mihail Çakirin adına koledjın hem KDU rolü üüretmäk proţesında.
«Bu çok taraflı insan. Adam angısı yapardı pek çok iş aydınnatmak uurunda, bilimcilik uurunda hem nicä haliz pravoslav klisesinin çobanı (pastıri), o yaptı diil az, — söledi istoriya uurunda doktor Diana Nikoglo.
Konferenţiyanın sonunda Gagauziyanın Bilim Merkezin başı İrina Konstantinova okudu rezolüţıyayı hem nışannadı bu oluşların önmeliini bütün cümneyä deyni.
«Büün açıldı zal, konferenţ zalı Mihail Çakirin adına. Bu o er, nereyi geleciiz biz da, bizim kollegalar da, neredä geçiriliceklär türlü oluşlar, angıları baalıı Mihail Çakirlän hem onun yaptıklarınnan», — nışannadı GBM başı.
İleri dooru plana koyulu imzalamaa iki taraflık dostluk baalantılarını Gagauziyanın Bilim Merkezin hem Moldovanın Devlet Universiteti aralarında.
Источник grt.md
