04 10 21 YARADICILIK EVİN DOLAYINDA DİKTİLÄR TUYA AAÇLARINI
Geçän pazar günü Komrat yaradıcılık evin üürenicileri barabar iş adamnarınnan hem Gagauziyanın başkanınnaan İrinaylan Vlah ekologiya akţiyasını geçirdilär — diktilär 150 tuya finanını üürenmäk kurumun dolayında.
Fidannarın dikmesindä pay aldılar biznes adamnarı hem hep ölä yaradıcılık evin üüredicileri hem üürenicileri. İş adamnarı nışannadılar, ani bölä uurda akţiyalar yardım edeceklär uşaklara sevmää hem korumaa nataurayı. İdeyäyi onu geçirmää kabletti bütün komanda.
«Bizdä Bizness Tractor camp oluşu geçti. Kurduk biznes proektini da topladık para. Bilmäzdik nereyi onnarı harcamaa, sora geldi ideya onnarı fidannarın dikmesinä harcamaa. Kararladık yaradıcılık evin yanında aaçları dikmää . Biz tutturduk bunu, da te biz buradayız», — söledi iş adamı Andrean Pleşka.
«Biz pek sevineriz , ani bu takım yardım ettik. İlktän düşündük , ani daa dikecez, ama gezeräk Komradın merkezindä biz gördük, ani kasabada az eşillik var. Da biz bu takım uşaklara yardım etmää kararladık. Da herkeret açan biz gelecez Komrada, her keret görecez, nicä bu uşaklar fidannarlan barabar büyeceklär», — paylaştı iş adamı Aleksandr Dmİtrİenko.
Oluşta pay aldı Gagauziyanın başı İrina Vlah. O urguladı , ani biznes adamnarın yardımı avtonomiyaya deyni pek önemli.
Yaradacılık evin başı nışannadı , ani bölä yardım biznes tarafından sürpriz gibi oldu . İleri dooru uşaklar bu fidannarı koruyaceklar , hem butakım yapının dolayı gözellenecek.
«Bän sponsorların tarafından yardıma pek sevindim. Onnar hiç annamȇȇrlar nesoy iilik bizim kasabaya yaptılar, bizim yaradıcılık evinä. Neçinki burada dolay açıktı. Da açan bu fidannar büüyeceklär , onnar yapımızı kapayaceklar da aulcuk gibi olacek. Bu pek gözäl olacek. İnsannar geçärkänä sevineceklär», — sayȇr yaradıcılık evin başı Maria Melkan.
Yakın 30 uşak üüredicilärlän hem musaafirlärlän büük havezlän fidannarı diktilär hem duyguları açıkladılar. Dikildi 150 tuya.
«Bän pek beenerim fidan dikmää, neçin zerä onnar tabiata yardım ederlär, da saa ol te onnara kim aldı».
«Bän da beenerim fidan dikmää, da kim onnarı getirdi saaol. Bizim yaradıcılık evi gözäl olacek da kimisi onnarı kırmasın».
«Lääzım bölä akţıyaları geçirmää ki taa gözäl olsun, da fidannar tozdan korusunnar».
«Biz büün geldik fidannarı dikmää, ki bizim kasabamız biraz taa gözäl olsun, soluk taa pak olsun. Ki hepsi burada ii yaşasın», — söledilär uşaklar.
«Uşaklar — evlat boyları angıları bizim ardımıza kalȇrlar. Da gücenikli , ani biz taa prost topraa brakacez nekadar onu kablettik. Uşaklar lääzım olacek bu eri baksınnar, tertiplesinnär. Erlem onnar naturayı sevmää üüreneceklär bu olacȇk büük kontribuţıya Gagauziyaya, Moldovaya», — sayȇr iş adamı Aleksandr Dmİtrİenko.
«Sayȇrım, ani bölä oluşlar Gagauziyaya deyni pek önemli, zerä uşakları üürederlär tabiatı sevmää. Onnar fidannarı korumaa üürenerlär. Onnar işlemää üürenerlär. Onun için bu önemli , ani onnarı yaradıcılık evin yanında diktilär. Da onnar her keret bölä oluşları geçireceklär», — söledi iş adamı Andrean Pleşka.
Tuya fidannarını Moldovanın Tractir Camp iş adamnarın klubu baaşladı.
Источник grt.md
