01 10 21 «TEKWİLL HERBİR ŞKOLADA» PROEKTİN ÇIKIŞLARI
Gagauziyanın üüretim baş bakannıın önemli taraflarının birisi — uşakları İT zanaantarın kabletmesinä hazırlamaa. Bu neetlän Gagauziya katıldı «TEKWİLL HERBİR ŞKOLADA» progamasına.
«TEKWİLL HERBİR ŞKOLADA» programanın yardımınnan 2021-2022 ci üürenmäk yılında binnärlän üürenici bütün devlettä üürenäbileceklär İT tehnologiyalarınnan baalı zannatları. Gerçeklemää deyni bu neetleri, programada avtonomiyanın üüredicileri aktiv pay aldılar.
«Sayȇrım ani bu pek önemli bir proekt. Bakarak proţentlerä, Gagauziyada taa çok üürenmäk kurumu programaya katıldılar, nekadar Moldovada. Burayı girdilär bizim en aktiv üüredicilerimiz informatika uurunda. Onnar çok eni kendilerinä deyni üürendilär. Veb dizayn, sayt kurulması, mobil kolaylıkları, elektron intellekt- hepsini bunnarı onnar veräbileceklär bizim uşaklarımıza da. İsteerim sölemää, ani ceviz ayında bölä uroklar bizim şkolalarımızda var», — Gagauziyanın üüretim baş bakannıın başı Natalyä Kristeva.
Programanın çıkışlarına görä belli oldu 3 üüredici, angıları hızlı işleyan noutbukları kabledeceklär. Bu tehnika uroklarda bu zanaatlara uşakları üüretmää yardımcı olacêklar.
«Gagauziyanın üüredicileri pek aktivdilär. Onnar kabledeceklär kaavı noutbukları, neçin deyni biz esap aldık, ani çoyunda üüredicilerdä yok lääzımnı tehnika uroklar için. Umutlanȇrız, ani bu zanaatlar uşaklarımıza büük fayda getireceklär», — «Tekwill» proektin öndercisi Anna Kiriţȇ.
Üüredicilerdän kaarä programaya katıldılar 1 420 üürenici dä. 3 üüredici programanın tarayıyıcıları olarak belli oldular. Onnardan biri — Pötr Kusursuz Çadır kasabasının M.Guboglo adına liţeyin informatika üüredicisi.
«Üüredici her zaman ne sä eni üürensin lääzım. Çekmää deyni uşakların dikkatlıını hem meraklıını lääzım herzaman ilerlemää, ozaman uşaklara meraklı olacêk hem onnar havezlän eni zanaatları üüreneceklär», — paylaştı o.
2024 ürenmäk yılınadan «TEKWILL HERBİR ŞKOLADA» progamasına Avtonomiyanın şkolalarının 90% lääzım katılsın.
Источник grt.md 01.10.2021